Դաժան ծեծի հետեւանքով մահացած Եղիշե Խաչատրյանի մայրը վստահ է` որդուն ծեծողների մեջ նաեւ Յուրի Հակոբյանն է եղել: Այս մասին այսօր` դեկտեմբերի 7-ին, լրագրողների հետ հանդիպմանն ասաց տուժողի իրավահաջորդի ներկայացուցիչ Ինեսսա Պետրոսյանը` անդրադառնալով Հակոբյանի պաշտպանի այն հայտարարությանը, թե իր պաշտպանյալը դեպքի վայրում չի եղել, այլուրեքությունը հաստատվել է:
«Նախաքննության ընթացքում ճանաչման գործընթաց նախաձեռնեց քննությունն իրականացնող մարմինը: Այդ ժամանակ չորս անձի, այդ թվում Յուրի Հակոբյանին, ներկայացրին Խաչատրյանի մորը` տիկին Էմմային, ճանաչման համար: Տիկին Էմման հստակ հայտարարեց, որ Յուրի Հակոբյանն իր որդուն ծեծողների մեջ է եղել: «Վիվարոյի» տեսախցիկները Յուրի Հակոբյանին ֆիքսել են դեպքի օրը ժամը 23:40-ին, երբ արդեն ողբերգությունը եղել էր: Նախաքննությամբ ապացուցվել է, որ դաժան ծեծը եղել է ժամը 23:05-ի սահմաններում, կանչը Շտապօգնություն գրանցվել է ժամը 23:14-ին»,- ասաց փաստաբանը:
Ըստ Պետրոսյանի` Եղիշե Խաչատրյանին սկզբում ծեծել են երեք անձ, նրանց մեջ նաեւ Յուրի Հակոբյանն է եղել, այնուհետեւ եւս երեքն են միացել, նրանց մեջ Խաչիկ Կոսյանն է եղել:
Նշենք, որ Յուրի Հակոբյանի փաստաբան Արմեն Նադիրյանը պնդում է, որ 58-ամյա Եղիշե Խաչատրյանի (հայտնի լեզվաբան Փառանձեմ Մեյթիխանյանի ամուսնու) սպանության մեջ մեղադրվող Յուրի Հակոբյանը դեպքի ժամանակ այլ վայրում է եղել, ինչն էլ նրա ալիբին է:
«Հստակ այլուրեքություն է ներկայացրել: Ասել է` ես գտնվել եմ այսինչ վայրում 23:00-ից սկսած, 23:40-ին հասել եմ մի ուրիշ վայր: Հիմա այդ մյուս վայրի տեսախցիկները ֆիքսել են նրան: Մյուս փաստն էլ, ասում ենք, ճշտելու համար, թող հարցաքննեն այդ վայրում գտնվողներին»,- ասել էր պաշտպանը:
Հիշեցնենք, որ հունիսի 4-ին, ժամը 23-ին, «Ֆորդ Տրանզիտ» մակնիշի ավտոմեքենայի վարորդ, 1958 թ. ծնված Եղիշե Խաչատրյանի եւ ճանապարհատրանսպորտային երթեւեկության կանոնները խախտած ավտոմեքենայի վարորդի եւ ուղեւորների միջեւ Նուբարաշենի խճուղու թիվ 1/5 հասցեի մոտ տեղի էր ունեցել վիճաբանություն, որի ընթացքում ստացած մարմնական վնասվածքներից Եղիշե Խաչատրյանը մահացել էր:
Նույն գործով կալանավորված են Երեւանի բնակիչներ 26-ամյա Խաչիկ Կոսյանը, 26-ամյա Արարատ Նիկողոսյանը, Արտաշես Չիչոյանը, Յուրի Հակոբյանն ու Արթուր Զաքարյանը:
