Մարոկկոյից Իսպանիա ուղեւորվող նավը, որում 43 միգրանտ է եղել, խորտակվել է, առնվազն 4 մարդ զոհվել է, մի քանիսն անհետ կորել են: «ՌԻԱ Նովոստի»-ի փոխանցմամբ՝ այս մասին հայտնել է «Սահմաններն անցնելիս» հասարակական կազմակերպությունը:
Նշվում է, որ հաջողվել է փրկել 30 մարդու:
Կազմակերպության ակտիվիստ Էլենա Մալենոյի խոսքով՝ ինքը հեռախոսային կապ է պահպանել նավում գտնվող մի շարք մարդկանց հետ: Նրա տվյալներով՝ նավը խորտակվել է Մարոկկոյի Էլ-Հոսեյմ քաղաքից ոչ հեռու: Քանդվել է նավի հատակը եւ մարդկանց մեծ մասը տախտակներից է կառչել, քանի որ լողալ չի իմացել:
Մարոկկոյի թագավորական ժանդարմերիան ծովում մարդկանց որոնումները շարունակում է: Վատ եղանակի պատճառով փրկության հավանականությունը նվազագույն է: