Ոստիկանության պետ, գեներալ-լեյտենանտ Վլադիմիր Գասպարյանն այսօր՝ դեկտեմբերի 7-ին, բարձրաստիճան սպաների ուղեկցությամբ, այցելել է Ոստիկանության զորքեր եւ ներկա գտնվել հասարակական կարգի պահպանման զորամասերից մեկի մարտավարամասնագիտական վարժանքներին:
Ոստիկանության զորքերի հրամանտար, գեներալ-լեյտենանտ Լեւոն Երանոսյանի զեկույցն ընդունելուց հետո Վլադիմիր Գասպարյանը ողջույնի խոսքով դիմել է զինծառայողներին:
«Ես հպարտանում եմ ձեզնով, տղերք: Հպարտանում եւ ուժեղանում եմ ձեզանով: Շնորհակալ եւ երախտապարտ եմ ձեզ, ձեր ընտանիքներին էս զրկանքների համար, որ դուք ապրում եք: Խոնարհվում եմ ձեր առաջ՝ լինելով ձեզանից մեկը»,-ասել է նա:
Վլադիմիր Գասպարյանն ու նրան ուղեկցող անձինք ծաղիկներ են խոնարհել սահմանների պաշտպանության ժամանակ եւ ծառայողական պարտականությունները կատարելիս զոհված ոստիկանների հուշակոթողներին:
Զինավարժանքը բաղկացած էր մի քանի գործողությունից, որոնցից յուրաքանչյուրում արագ արձագանքման մասնագիտացված խմբերը ներկայացնում էին կոնկրետ իրավիճակի խնդիրներն ու լուծումները:
Առաջին գործողության ընթացքում անհրաժեշտ էր գրավել զինված անձանց տեղափոխող բեռնատար ավտոմեքենա: Խնդրի բարդությունն այն էր, որ մեքենան պետք էր գրավել ընթացքի մեջ: Օգտագործվելու էին ինքնաձիգեր ու սառը զենք:
Հատուկ վաշտի զինծառայողների գործողությունից հետո իր առաջադրանքի իրականացմանն անցավ 2-րդ գումարտակի 1-ին վաշտը՝ փախուստի փորձ կատարող մարդատարի կանգնեցում՝ այնտեղ գտնվող անձանց վնասազերծումով, ինչին հետեւում է ձերբակալումն ու ուղեկցումը:
Այնուհետեւ հատուկ վաշտի ծառայողները ցուցադրեցին ձեռնամարտի հնարքներ:
Ամենածավալուն գործողությունն իրականացվեց հասարակական կարգի պահպանության հատուկ վաշտի, 1-ին վաշտի եւ հատուկ միջոցների կիրառման վաշտի համատեղ ուժերով: Ահաբեկիչների զավթած շինության ազատագրման գործողության մեջ ներգրավված էին երեք գրոհային խումբ, որոնց կրակային աջակցությունն իրականացնում էին «Տիգր» հատուկ նշանակության եւ զրահապատ մեքենաները: Գրոհային խմբերն օգտագործում էին տարբեր տրամաչափի գնդացիրներ, լուսաձայնային հատուկ միջոցներ, հրաձգային զենքեր, դիպուկահար հրացան եւ այլն:
Վարժանքն ավարտվեց ձեռնամարտի եւ զենքով վարժությունների ցուցադրական ելույթներով:
Ավարտին Վլադիմիր Գասպարյանը մասնակիցների հետ քննարկել է զինավարժանքի ընթացքը, ներկայացրել իր դիտարկումներն ու դիտողությունները եւ արդյունքները դրական գնահատելով՝ տվել կոնկրետ հանձնարարականներ:
