Հնդկաստանի ՌԾՈւ նավերը հզոր փոթորկի պատճառով դեռես չեն կարող մոտենալ Անդամանյան արշիպելագի կղզիներին, որպեսզի տարհանեն այնտեղ արգելափակված մոտ 1400 զբոսաշրջիկներին, հայտնում է The Times of India–ն։
Նախօրեին տեղական իշխանությունները դիմել էին ՌԾՈւ–ին՝ խնդրելով Հեւլոք եւ Նեյլ կղզիներից տարհանել զբոսաշրջիկներին, որոնք հզոր ցիկլոնի գոտում են հայտնվել, քանի որ քաղաքացիական նավերն ի վիճակի չեն եղել հյուրերին դուրս հանել արշիպելագից։ Կղզիների մոտ հզոր փոթորիկ է մոլեգնել, ու հորդառատ անձրեւ է տեղում։
Օդերեւութաբանների կանխատեսումների համաձայն՝ եղանակը կարող է բարելավվել 48 ժամվա ընթացքում, երբ ցիկլոնը սկսի շարժվել դեպի արեւմուտք։ 4 ռազմանավ կղզիներից մոտ 50 կմ հեռավորության վրա սպասում են դրանց մոտենալու հնարավորությանը։ Բոլոր տարհանվածներին կտեղափոխեն Պորտ Բլեր քաղաք։