Աղվերանում կայացած Բաց տվյալների հաքաթոնում հաղթած երեք թիմերը հնարավորություն ստացան անցնել Կոլբա լաբի ինկուբացիոն շրջանը:
Հանձնաժողովի անդամների քննարկումների եւ գնահատման արդյունքում ընտրված երեք լուծումներն են՝ hosanq.info-ն, որն, օգտագործելով ՀԵՑ-ի բաց տվյալների շտեմարանը, հնարավորություն է ընձեռում հետեւել էլեկտրաէներգիայի ծախսի անհատական պատմությանը, Խոշոր հարկատուների տվյալների վիզուալիզացիայի harkatu.am հարթակը եւ GeoVizData թիմը, ում ստեղծած լուծումը, օգտագործելով բաց տվյալների երկու շտեմարանների՝ առողջապահության եւ արտակարգ իրավիճակների քարտեզների տվյալները, վիզուալիզացիայի է իրականացնում՝ օգտագործելով գեո-տարածական տեխնոլոգիաները (Geospatial Technologies):
Կոլբա լաբի կազմակերպած հաքաթոնին մասնակցում էին ավելի քան 50 ծրագրավորողներ: Յուրաքանչյուր թիմ ուներ հինգ րոպե գնահատող հանձնաժողովին ներկայացնելու քսան ժամից ավել տեւող ծրագրավորման ու համատեղ աշխատանքի արդյունքը:
Հաքաթոնի մասնակիցներին հասանելի էին բաց տվյալների երեք հիմնական շտեմարաններ՝ առողջապահության ոլորտի տվյալներ (ապանձնավորված բուժ. հաստատություններ այցերի տվյալներ), Արտակարգ իրավիճակների նախարարության կողմից տրամադրված ռիսկերի քարտեզները եւ datalex.am հարթակի վրա հասանելի դատական գործերի շտեմարանները, որոնց հիման վրա էլ մշակվեցին նորարար լուծումները:
Դեկտեմբերի 3-4-ը Աղվերանում անցկացված երկօրյա հաքաթոնի նպատակն էր օգտագործել պետական հատվածի բաց տվյալները եւ փորձել մշակել Հայաստանում առկա խնդիրների նորարար լուծումներ: Հաքաթոնը կազմակերպվել էր «Նորարար առաջընթաց» ծրագրի շրջանակում, որը ֆինանսավորվում է Եվրոպական միության կողմից:
