Բոլոր հիմքերը կան պնդելու, որ Հայաստանն ընկել է վարկային տենդի մեջ։ Այս մասին այսօր` դեկտեմբերի 22-ին, խորհրդարանում ասաց ՀԱԿ խմբակցության պատգամավոր Նիկոլ Փաշինյանը` անդրադառնալով քննարկվող երեք վարկային համաձայնագրերին:
«2016-2018 թթ․ միջնաժամկետ ծախսերի ծրագրով նախատեսվում է, որ 2016թ․ պետական պարտքի սպասարկման համար մեր բյուջեից պետք է ծախսվեր 93 մլդ դրամ, մինչդեռ իրականում ծախսվել է 151 մլդ դրամ, այսինքն 62%-ով ավել։ Միջնաժամկետ ծախսերի ծրագրով նախատեսվում էր, որ 2017թ․ պետական պարտքի սպասարկման համար պետք է ծախսվի 99 մլդ դրամ, ու Ազգային ժողովը դա ընդունել է։ Մեր պետական պարտքի սպասարկմանն ավելի շատ գումար ենք տալիս, քան առողջապահության եւ կրթական ոլորտին»,- ասաց Նիկոլ Փաշինյանը:
Մինչև դեկտեմբերի 30-ը ստացեք գրավով ապահովված սպառողական վարկեր 18-19% տարեկան տոկոսադրույքով: |
Ըստ պատգամավորի` պետական ծախսերի մեջ սա երրորդ տեղն է զբաղեցնում` սոցիալական ապահովության եւ պաշտպանության ոլորտներից հետո. Պետական պարտքի սպասարկումը կազմում է բյուջեի 8․8%-ը, մինչդեռ նախորդ տարում այն կազմել է 7․2%. «Միայն ընթացիկ 2 տարվա ընթացքում ներքին եկամուտները կանխատեսվածից արդեն 1 մլդ դոլարի չափով պակասել են, իսկ պետական պարտքի սպասարկումը 320 մլն դոլարով աճել է։ Այո, լինում է կանխատեսում, կանխատեսումից մինչեւ 5 տոկոսի շեղում, բայց կանխատեսումից 91 տոկոս շեղումը ի՞նչ է նշանակում։ Նշանակում է, որ կանխատեսողը ընդհանրապես չի տիրապետում իրավիճակին, տվյալ դեպքում կառավարությունը»:
Նիկոլ Փաշինյանի համար զարմանալի է կառավարության այն մոտեցումը, թե վստահում են, վարկ են տալիս: Պատգամավորը պատմեց` նախօրեին Մեղրիի մի բնակչից ահազանգ է ունեցել.
«Երեկ ինձ զանգել էր մարզի բնակիչ եւ ասում էր, որ բանկին 1000 դոլար փող է պարտք եւ ժամկետն անցել է։ Բանկը նրան ասել էր՝ չե՞ս կարողանում պարտքդ փակես, արի 300․000-ը տուր, մենք քեզ նոր վարկ կտանք հինը փակելու համար։ Հիմա էս գյուղացին ասի՝ ինձ վարկ են տալիս, ես վարկունակ եմ։ Վարկ են տալիս, որ վարկը փակի։ Նույնն էլ ՀՀ-ն ա, 500մլն վարկ են տակիս, որ 300 մլն փակի»,-ասաց նա։
Պատգամավորը օրինաբ բերեց նաեւ Հյուսիս-հարավ ճանապարհը. «Սկզբում սխալ են կառուցել, քանդել են նորից են սկսել կառուցել։ Մարդ 1մլդ ծախսի, հետո պարզվի, որ սխալ են կառուցել։ Էտ նույնն ա, որ մարդ տուն կառուցի, հետո պարզվի, որ տանը ոչ դուռ կա, ոչ լուսամուտ։Ու սրա համար ո՞ վ ա պատասխան տալի, ոչ մեկ։ Նրանք ճանապարհ չէին կառուցում, այլ փող էին լափում։ Իրանց գործը հո ճանապարհ կառուցե՞լը չէ, այլ փող լափելը։ Ու դրանից հետո Գագիկ Բեգլարյանը ՀՀԿ համագումարի ժամանակ շռնդալից կերպով նշանակվում է իշխող կուսակցության պալիտբյուրոյի անդամ։ Հիմա էլ ամբողջ Հայաստանը պետք ա վարկով Նոր Տարի անի։ Շնորհավոր Ամանոր եւ Սուրբ Ծնունդ»: