Թուրքիայի իշխանությունները երկրում անթաքույց բռնապետության հաստատմանն ուղղված հերթական քայլերն են ձեռնարկել:
Anadolu գործակալության հաղորդմամբ՝ կառավարության պաշտոնական «Resmi Gazete» պարբերականում նախարարների կաբինետի երեք նոր որոշում է հրապարակվել, որոնք կայացվել են երկրում գործող արտակարգ իրադրության ռեժիմին համապատասխան եւ օրենքի ուժ ունեն: Մասնավորապես, նախատեսվում է 83 հասարակական կազմակերպության փակում, որոնք գործունեությունը, իշխանությունների կարծիքով, սպառնալիք է Թուրքիայի ազգային անվտանգության համար:
Բացի այդ, իրավապահներին պաշտոնապես թույլատրվել է հետեւել համացանցին, ուսումնասիրել վիրտուալ տարածքի օգտատերերի տվյալներին: Միաժամանակ, Թուրքիայի այն քաղաքացիները, որոնք պաշտոնական կառույցների պահանջով երեք ամսվա ընթացքում չեն վերադառնա հայրենիք, կարող են զրկվել քաղաքացիությունից:
Հունվարի 3-ին Թուրքիայի խորհրդարանը հաստատել էր երկրում արտակարգ դրության ռեժիմը եւս 3 ամսով երկարաձգելու մասին կառավարության առաջարկը: Այն երկարաձգվել է 90 օրով՝ հունվարի 19-ից սկսած:
