Հայաստանում գազն էժանացել է Ռուսաստանի եւ Վրաստանի բանակցությունների ելքի շնորհիվ: Այս մասին հունվարի 13-ին՝ մամուլի ասուլիսի ժամանակ հայտարարեց վարչապետ Կարեն Կարապետյանը:
Նրա խոսքով՝ Հայաստան ռուսական գազի տարանցման համար Վրաստանը դրա ծավալի 10 տոկոսն էր ստանում: Այժմ նա այդ 10 տոկոս գազը կստանա առաջին միլիարդ խորանարդ մետրից: Հաջորդ միլիարդից Թբիլիսին ոչ թե գազ կստանա, այլ կանխիկ փող, սակայն փոքր-ինչ քիչ ծավալով: Այս կրճատման հաշվին էլ հաջողվել է Հայաստանում սակագները նվազեցնել: «Այդ փողով վրացական կողմն իր հայեցողությամբ կարող է գազ ձեռք բերել ցանկացած մատակարարից: Տեսականորեն դա կարող է լինել նաեւ Հայաստանի տարածքով տարանցվող իրանական գազը: Ամեն ինչ շուկան կորոշի: Եթե առաջարկը խելամիտ լինի, նրանք դրանից կօգտվեն, եթե ոչ, ապա ոչ»,- հավելեց վարչապետը:
