Ճապոնացի սերֆերին, որը մի ամբողջ գիշեր ծովում էր անցկացրել, փրկել է բեռնատար նավի անձնակազմը Ավստրալիայի ափի մոտ, հայտնում է BBC–ի Ռուսական ծառայությունը։
MSC Damla բեռնատար նավի նավաստիները ափից 6 կմ հեռավորության վրա նկատել էին ջրում տարուբերվող սերֆերին ու նրան փրկարարական օղակի միջոցով նավ բարձրացրել։
«Երջանիկ պատահականություն է, որ մեր թիմը նկատել է այդ մարդուն»,- ասել է MSC Damla –ի կառավարող տնօրեն Կեվին Կլարկը։
37-ամյա սերֆերը ոստիկանությունում պատմել է, որ ինքը բաց ծովում էր հայտնվել ուժեղ հոսանքի պատճառով՝ հայտնվելով Սիդնեյից 80 կմ հեռավորության վրա։
Ճապոնացին վեց ժամ փորձել է հասնել ափ, մինչեւ որ ուժասպառ է եղել, ասել է տեսուչ Դարեն Վուդը։ Սերֆերը ջրում անցկացրել է 16 ժամ, բայց գիշերը ջերմաստիճանը իջել է ընդամենը մինչեւ +21 աստիճան, ինչի շնորհիվ ճապոնացին խուսափել է սառելուց։ Պորտ Քեմբլից ուղեւորված նավը նրան ափ է վերադարձրել։ Ճապոնացուն տեղափոխել են հիվանդանոց, բայց շուտ դուրս են գրել։