Այս ձմեռ բնակչության մեծ մասը չի կարողացել լիարժեք տաքացնել բնակարանները, թեև ծախսել է շատ էլեկտրաէներգիա եւ գազ։ Այսօր՝ հունվարի 16-ին Երեւանում NEWS.am-ի անցկացրած հարցման մասնակիցների զգալի մասն ասաց, որ դեկտեմբեր ամսվա գազի եւ էլեկտրաէներգիայի վճարները բավականին շատ են եղել՝ նախորդ տարվա նույն ժամանակահատվածի համեմատ։

«Վախենում ենք վառենք, չի հերիքի էդ գումարը՝ համ ուտես, համ ապրես, համ վճարես»,- ասաց քաղաքացիներից մեկը։

Չնայած դրան՝ բնակիչները հիմնականում դժգոհում են բնակարանների տաքությունից. «Վառում ենք, հոսանքը գնում ա անտեղի, բայց տաքություն չկա»,- ասաց մեկ ուրիշը։

Քաղաքացիները շատ վառելու եւ քիչ տաքանալու տարբեր պատճառներ են նշում. ոմանց կարծիքով պատճառն այս տարվա ցուրտ եղանակային պայմաններն են, որոշները պատճառ են համարում թանկացումները։ Քաղաքացիներից մի քանիսն էլ կարծում են, որ գազի ճնշումն է ցածր։

«Օդ ա, օդ, եթե սուրճը չի եփում, ճաշը ինչքա՞ն ժամանակում կարելի է եփել։ Միշտ էդպես ա եղել, էլի։ Բայց քանի գնում, շատանում ա, ոչ թե պակասում»,- ասաց նրանցից մեկը։