Կենտրոնական Իտալիայում եղանակային վատ պայմանների պատճառով փրկարարները չեն կարողանում հասնել Rigopiano di Farindola հյուրանոցին, որի վրա մի քանի ժամ առաջ ձնահյուսք է թափվել: ԱՆՍԱ գործակալությունը հայտնում է, որ փրկարար ծառայության աշխատակիցները մինչեւ հյուրանոց հասնելը պետք եւս մոտ 5 կմ հաղթահարեն:
Արդեն հաղորդվել է, որ ձյան տակ թաղված հյուրանոցում ավելի քան 20 մարդ կա, որոնցից երկուսը երեխաներ են: Ձնահյուսքը քանդել է շենքի մի մասը, հյուրանոցի հյուրերի եւ աշխատակիցների հեռախոսները չեն պատասխանում: Վերջին հաղորդմամբ՝ նրանք շտապ օգնություն են խնդրել եւ ասել են, որ ցրտին չեն դիմանում:
Եղանակի պատճառով փրկարարներն այլեւս չեն կարողանում հատուկ տեխնիկա օգտագործել: Նրանք փորձում են ծովի մակարդակից 1200 մետր բարձրությամբ գտնվող հյուրանոց հասնել դահուկներով: Հաղորդվում է, որ ճանապարհի ձյան շերտը հասնում է 3-4 մետրի:
