Հանրապետական կուսակցությունը դեռ չի որոշել՝ ով է լինելու ցուցակի առաջին համարում։ Այս մասին այսօր՝ հունվարի 19-ին՝ ՀՀԿ ԳՄ նիստից հետո լրագրողների հետ զրույցում հայտնեց Հանրապետական կուսակցության մամուլի քարտուղար Էդուարդ Շարմազանովը։
«Դեռ չենք քննարկել ցուցակի հետ կապված հարցեր՝ ով է լինելու, ով չի լինելու, ով է լինելու առաջին համարը, կքննարկենք խորհրդի նիստից հետո, կքննարկենք հունվարի 26-ին կայանալիք խոհրդի նիստին, որը տեղի կունենա ԳՄ նիստից հետո, կընտրվի ՀՀԿ խորհրդի նոր կազմ: Ըստ Շարմազանովի՝ խորհրդի անդամների 200-ից ավելի թեկնածուներ կան»,- ասաց նա։
Շարմազանովը նշեց, որ նիստի ընթացքում քննարկվել են հիմնականում առաջիկա ընտրություններում մասնակցության ձևաչափի հետ կապված հարցեր. «Քննարկել ենք ներկուսակցական, ներքաղաքական, քաղաքական զարգացումների հետ կապված հարցեր, ընտրությունների հետ կապված ծրագրի, ռազմավարության, մարտավարության, մեր թեկնածուների հետ կապված խնդիրներն ենք քննարկել, անդրադարձ է եղել խորհրդի ապագա նիստին, խորհրդի անդամների և նոր անդամների քննարկում է եղել, ներկուսակցական երկարատեւ աշխատանք է տեղի ունեցել այսօր»։
Նա հավելեց, որ քարոզչական խումբը և շտաբի կառուցվածքը հայտնի կլինի փետրվարին։
«Կազմակերպչական աշխատանքները սկսվել են, բայց դեռ չեն ավարտվել, մինչև փետրվար ամիսը մենք կներկայացնենք մեր շտաբի ղեկավարին, շտաբի կառուցվածքը, իսկ փետրվարի 6-16-ն էլ օրենքով սահմանված ժամկետներում կներկայացնենք ԿԸՀ»,- ասաց նա։
Նշենք, որ Էդուրադ Շարմազանովը նշեց, որ ՀՀԿ ԳՄ այսօրվա նիստին ՀՀ նախկին վարչապետ Հովիկ Աբրահամյանը չի մասնակցել։
