Արցախում փետրվարի 20-ին կայանալիք Սահմանադրական բարեփոխումների հանրաքվեի քարոզարշավը հունվարի 19–ից մեկնարկել է, սակայն կուսակցությունները դեռեւս շտաբներ ձեւավորելու փուլում են։
Այս պահին հայտնի է, որ քարոզարշավին ակտիվ պատրաստվում են խորհրդարանում ներկայացված 3 քաղաքական ուժ. «Ազգային վերածնունդ», «Ազատ հայրենիք» եւ Արցախի ժողովրդավարական կուսակցությունները։
NEWS.am-ի հետ զրույցում «Ազգային վերածնունդ» կուսակցության նախագահ Հայկ Խանումյանի խոսքով՝ իրենք հունվարի 21–ին գործադիր մարմնի նիստ են հրավիրել, որի ժամանակ որոշում է կայացվել ձեւավորել Հանրաքվեի շտաբ՝ Սահմանադրական փոփոխությունների նախագծի դեմ քարոզչության համար:
«Մարտավարությունը դեռ չենք մշակել, այս պահին կարող եմ ասել, որ հանրահավաքներ չեն լինելու, քանի որ մեզ մոտ նույնիսկ խորհրդարանական եւ նախագահական ընտրությունների ժամանակ նման հանրահավաքներ չեն լինում։ Արցախում քարոզարշավը յուրահատուկ բնույթ ունի, մարտավարությունը դեռ կմշակենք, մեծ ռեսուրսներ չունենք, փորձում ենք ռեսուրսներին համապատասխան, բայց հնարավորինս արդյունավետ քարոզչություն իրականացնել»,– ասաց նա՝ նշելով, որ շտաբի աշխատանքներն ինքն է համակարգելու։
Մյուս երկու ուժերը՝ «Ազատ հայրենիքն» եւ Արցախի ժողովրդավարական կուսակցությունը քարոզելու են կողմ քվեարկել Սահմանադրական բարեփոխումներին։ «Ազատ հայրենիք» կուսակցության անդամ Ռուդիկ Հյուսնունցի խոսքով, շուտով ստեղծվելու է շտաբ, որի աշխատանքները համակարգելու է Գագիկ Պետրոսյանը։
«Քարոզարշավը երկու կուսակցությունների նախագահները՝ վարչապետ Արայիկ Հարությունյանն ու Ազգային ժողովի նախագահ Աշոտ Ղուլյանն են իրականացնելու»,– ասաց նա։
Նշենք, որ հունվարի 17–ին, ԼՂՀ խորհրդարանը հաստատել է սահմանդրական բարեփոխումների փաթեթը 20 կողմ, 7 դեմ եւ 1 ձեռնպահ ձայներով: Կառավարման նախագահական մոդելին անցնելուն դեմ է ՀՅԴ–ն եւ Հայկ Խանումյանի կուսակցությունը։
Հանրաքվեն տեղի կունենա փետրվարի 20-ին: