Գյուղացիներին պարտք մնացած «Վինար» գինու գործարանի գործը դեռեւս դատախազությունում է: Այս մասին փետրվարի 2-ին՝ կառավարության նիստից հետո լրագրողներին ասաց գյուղատնտեսության նախարար Իգնատի Առաքելյանը:
Նրա խոսքով՝ գյուղնախարարությունը կապվել է մյուս գործարանների հետ եւ նրանց առաջարկել «Վինարի» պաշարներից խաղողի սպիրտ գնել, որպեսզի գործարանը գյուղացիներին վճարի մթերած խաղողի դիմաց: «Մենք վաճառքն այնքան ենք կազմակերպել, որքան հնարավոր է եղել: Պարտքեր մնացել են: «Վինարի» ներկայացուցիչների հավաստիացմամբ՝ իրենք դեռեւս սպիրտ ունեն, բայց մեր տեղեկություններով՝ չունեն: Այդ պատճառով դատախազություն ենք դիմել»,- հավելեց նախարարը: