Ֆինլանդիայի խորհրդարանը մերժել է նույնասեռականների ամուսնությունների մասին օրենքի չեղարկումը պահանջող քաղաքացիական նախաձեռնությունը։ Այդ հանրագրի դեմ է քվեարկել 120 պատգամավոր, հայտնում է BBC–ի Ռուսական ծառայությունը։
«Խորհրդարանը հաստատել է, որ նույնասեռականների ամուսնությունները այսուհետ ու մեկընդմիշտ 100 տոկոսով թույլատրվելու են։ Երջանկություն ենք մաղթում»,- գրել է իր «Թվիթերում» «Կանաչ միություն» կուսակցության առաջնորդ Վիլլե Նիյնիստյոն։
Նույնասեռականների պաշտոնական ամուսնությունները թույլատրող օրենքը Ֆինլանդիայում ընդունվել է 2014-ին, մարտի 1-ից այն ուժի մեջ է մտնելու։ Ֆինլանդիան այսպիսով դարձել է 12-րդ եվրոպական երկիրը, որտեղ թույլատրվում են նույնասեռականների ամուսնությունները։
Այդ օրենքի ընդդիմախոսները հանրագիր էին նախաձեռնել, որը ստորագրել էր ավելի քան 50 հազար մարդ։