Քուրդ խորթ հոր սպանության համար 8 տարվա ազատազրկման դատապարտված Մաքսիմ Բաքոյանը ներման խնդրանքով կդիմի Հանրապետության նախագահին: Այս մասին NEWS.am-ին ասաց նրա փաստաբան Մամիկոն Մուրադյանը:
Նշենք, որ օրերս Վճռաբեկ դատարանը մերժել է Բաքոյանի փաստաբանի բողոքը եւ օրինական ուժի մեջ թողել Վերաքննիչ քրեական դատարանի որոշումը, որով Մաքսիմ Բաքոյանը դատապարտվել էր 8 տարվա ազատազրկման: Հիշեցնենք, որ Շիրակի մարզի ընդհանուր իրավասության դատարանը 4 տարվա ազատազրկման էր դատապարտել գյումրեցի երիտասարդին:
Ավելի վաղ հայտնել էինք, որ եզդի Մաքսիմ Բաքոյանի մորը՝ Մայա Բաքոյանին, 2013թ. Թուրքիայում սպանել էր ամուսնու՝ ազգությամբ քուրդ Էվիլիա Գյուլիշթեքինի եղբայրը՝ կնոջ 4 տարեկան որդու աչքի առջեւ հրազենային մահացու վնասվածք հասցնելով հարսին:
2014 թվականի մարտին Մաքսիմը, որը մինչ այդ Գերմանիայում էր ապրում, վերադարձել էր Գյումրի: Մարտի 15-ին նա դանակահարելով սպանել էր խորթ հորը։ Սպանությանն ականատես էր եղել Մաքսիմի մորաքույրը, որը NEWS.am-ին պատմել էր, որ Մաքսիմը դանակը մտցրել է խորթ հոր սիրտը, երբ վերջինն ասել է, որ Թուրքիա է գնալու՝ նրա մոր արյան փողը վերցնելու: Մաքսիմը, ըստ մորաքրոջ, խորթ հոր խոսքերից ենթադրել էր, որ նրա պատվերով է եղբայրը սպանել իր մորը եւ որոշել է վրեժ լուծել:
Մաքսիմ Բաքոյանին մեղադրանք է առաջադրվել ՔՕ 104-րդ հոդվածի 1-ին մասի հատկանիշներով։