Մենք անտարբեր չենք Երեւանում ԵԱՀԿ-ի գրասենյակի ճակատագրի հանդեպ: Այս մասին փետրվարի 22-ին Մոսկվայում կայացած ՀՀ ԱԳ նախարար Էդվարդ Նալբանդյանի հետ համատեղ մամուլի ասուլիսի ժամանակ հայտարարել է ՌԴ ԱԳ նախարար Սերգեյ Լավրովը:
Լավրովն ընդգծել է, որ Մոսկվան աջակցում է այն սկզբունքին, որի համաձայն՝ գրասենյակները բացվում են երկրի ցանկությանը համապատասխան: «Տվյալ դեպքում առավել եւս անտարբեր չենք, քանի որ գրասենյակի ղեկավարը Ռուսաստանի քաղաքացի է»,- նշել է նախարարը:
Ինչ վերաբերում է կոնկրետ ծրագրերին, ապա Լավրովը նշել է, որ դրանք պետք է համապատասխանեն ԵԱՀԿ-ի սկզբունքներին եւ ոչ մի կասկած չառաջացնեն: Նա հիշեցրել է, որ տվյալ դեպքում ադրբեջանցի գործընկերների մոտ հարցեր են առաջացել: Գերմանիայի, այնուհետեւ Ավստրիայի նախագահությունն այս հարցով ակտիվորեն զբաղվել է: Ինձ թվում է, որ Ավստրիայի նախագահության վերջին առաջարկը ծագած բոլոր խնդիրները լուծում է: Հուսով եմ, որ մոտ ժամանակներս հնարավոր կլինի այդ հարցին վերադառնալ եւ իրավիճակը հաղթահարել, նշել է Լավրովը:
Նախկինում հաղորդվել է, որ ԵԱՀԿ-ի երեւանյան գրասենյակի մանդատի երկարաձգման հարցում կոնսենսուսի բացակայության պատճառով գրասենյակի գործունեությունը ժամանակավորապես «առկախվել» է: Ադրբեջանը պահանջներ է ներկայացրել ականազերծման տրենինգներին վերաբերող ծրագրերի կապակցությամբ: Գերմանիայի, այնուհետեւ Ավստրիայի նախագահությունը փորձել է Ադրբեջանին համոզել պահանջների անհիմն լինելը, սակայն դեռեւս անարդյունք: Հայկական կողմը համաձայնվել է ծրագիրը դադարեցնել, սակայն Ադրբեջանը շարունակում է ԵԱՀԿ-ի երեւանյան գրասեյակի աշխատանքին խանգարելու փորձերը: