Գյումրիի «Պրոգրես» համալսարանի ռեկտոր Ռաֆիկ Խաչատրյանին մեղադրանք է առաջադրվել` դիպլոմներ կեղծելու եւ դրանք կաշառքի դիմաց տարբեր անձանց տրամադրելու համար:
Նախաքննությամբ պարզվել է, որ Ռաֆիկ Խաչատրյանը համաձայնել է իր ծանոթի առաջարկին` նրա միջնորդությամբ ԱՄՆ-ում բնակվող եւ Հայաստանից բացակայող մի շարք անձանց տվյալներով դուրս է գրել նշված համալսարանի բարձրագույն կամ մասնագիտական կրթության մասին ավարտական դիպլոմներ: Յուրաքանչյուր դիպլոմի դուրս գրման համար որպես կաշառք պահանջել է 700-900 ԱՄՆ դոլար, այնուհետեւ իր ծանոթից ստացված անձանց տվյալներով պատրաստել է պետական նմուշի 7 դիպլոմ եւ որպես կաշառք ստացել է 5 հազար 9 հարյուր ԱՄՆ դոլար:
Բացի դրանից, Ռաֆիկ Խաչատրյանը 2015թ. մայիսին կազմել է Ւրանի քաղաքացու տվյալներով չհավատարմագրված դիպլոմ ու դրա հավելվածը եւ տրամադրել իրեն դիմած անձնավորությանը:
Ռեկտորին մեղադրանք է առաջադրվել Քրեական օրենսգրքի 200-րդ հոդվածի 3-րդ մասով (առեւտրային կամ այլ կազմակերպության ծառայողի, արբիտրի, այդ թվում՝ օտարերկրյա պետության՝ արբիտրաժի մասին օրենսդրությանը համապատասխան՝ գործառույթներ իրականացնող արբիտրի, աուդիտորի կամ փաստաբանի կողմից կաշառք ստանալը,) եւ 214-րդ հոդվածի 1-ին մասով (Առեւտրային կամ այլ կազմակերպությունների ծառայողների կողմից իրենց կարգադրիչ կամ այլ լիազորություններն այդ կազմակերպության շահերին հակառակ եւ իր կամ ուրիշ անձանց օգտին օգտագործելու կամ առավելություններ ձեռք բերելու կամ այլ անձանց վնաս պատճառելու նպատակով օգտագործելը, եթե անձանց, կազմակերպությունների կամ պետության իրավունքներին ու օրինական շահերին էական վնաս է պատճառվել): Խափանման միջոց է ընտրվել ստորագրություն չհեռանալու մասին:
Գործը քննվում է Շիրակի մարզի ընդհանուր իրավասության դատարանում:
Նշենք, որ Ռաֆիկ Խաչատրյանը փիլիսոփայության գիտությունների դոկտոր է, սպորտի վաստակավոր աշխատող: