ՀՀ նախագահ Սերժ Սարգսյանն այսօր շնորհավորական ուղերձ է հղել կոմպոզիտոր, դաշնակահար, Հայաստանի Հանրապետության Պատվո շքանշանի ասպետ Միշել Լեգրանին ծննդյան 85-րդ տարեդարձի կապակցությամբ՝ մաղթելով հոբելյարին առողջություն, արեւշատություն, ստեղծագործական բերկրանքի բազում առիթներ:
«Դուք համաշխարհային երաժշտության լեգենդներից եք, հպարտության եւ հիացմունքի արժանի մեծագույն արվեստագետ: Ձեր ստեղծագործական մտքի թռիչքը նոր հորիզոններ բացեց ֆրանսիական եւ համաշխարհային երաժշտության արտահայտչաձեւերում:
Մտավորականի անկեղծության եւ նրբանկատության դրոշմը կրող երկերում Դուք նորովի եք ներկայացնում մարդկային ապրումներն ու հույզերը, էության եւ լինելության հավերժական առեղծվածները:
Հայաստանում Ձեր արվեստը մեծապես սիրված է եւ սպասված: Հայ ունկնդիրը փոխադարձ կապ է զգում Ձեր ստեղծագործությունների, մարդկային կերպարի եւ ընդհանուր ճակատագրի հետ»,-ասված է ՀՀ նախագահի շնորհավորական ուղերձում: