ՀՀ ՔԿ Երեւանի քննչական վարչության Ավան եւ Նոր Նորք վարչական շրջանների քննչական բաժնում քննվող քրեական գործով բացահայտվել է գիշերօթիկ թիվ 17 հատուկ դպրոցից ջեռուցման համակարգի մարտկոցների գողությունը։
ՀՀ Քննչական կոմիտեից NEWS.am-ին հայտնում են, որ նախնական տվյալներով՝ 2017թ. փետրվարի 23-ին, առերեւույթ հանցագործություն կատարած անձը, տեխնիկական միջոցների գործադրմամբ բացել է գիշերօթիկ թիվ 17 հատուկ դպրոցի պատուհանը եւ գաղտնի հափշտակել ընդհանուր 23 հատ ջեռուցման համակարգի մարտկոց՝ դպրոցին պատճառելով 920.000 ՀՀ դրամի գույքային վնաս:
Դեպքի առթիվ ՀՀ քննչական կոմիետի Ավան եւ Նոր Նորք վարչական շրջանների քննչական բաժնում փետրվարի 24-ին հարուցվել է քրեական գործ՝ ՀՀ քրեական օրենսգրքի 177-րդ հոդվածի 2-րդ մասի 2-րդ եւ 3-րդ կետերով եւ իրականացվել անհրաժեշտ քննչական եւ օպերատիվ-որոնողական միջոցառումներ՝ հանցագործությունը բացահայտելու ուղղությամբ։
Արդյունքում՝ բավարար ապացույցներ են ձեռք բերվել առերեւույթ հանցագործություն կատարած անձի ինքնության վերաբերյալ, ով ձերբակալվել է եւ օրենքով սահմանված կարգով հարցաքննվել։
Կասկածյալը դպրոցի նախկին սան է եւ հարցաքննության ժամանակ նկարագրել է դեպքի հանգամանքները եւ հայտնել, որ գողոնը վաճառել է 5000 դրամով։ Գնորդը հայտնաբերվել է եւ հարցաքննվել։
Նախաքննությունը շարունակվում է:
