Նախնական տվյալով, փետրվարի 23-ի գիշերն անսթափ վիճակում Պաշտպանության նախարարության տարածք ներխուժած Արմեն Եփրեմյանին մեղադրանք է առաջադրվել:

NEWS.am-ի թղթակցին Եփրեմյանի պաշտպան Արայիկ Ալվանդյանը հայտնեց, որ նրան մեղադրանք է առաջադրվել Քրեական օրենսգրքի 258-րդ հոդվածի 2-րդ մասով (խուլիգանությունը, որը զուգորդվել է անձի նկատմամբ բռնություն գործադրելով կամ դա գործադրելու սպառնալիքով, ինչպես նաև ուրիշի գույքը ոչնչացնելով կամ վնասելով՝) եւ 327-րդ հոդվածի 6-րդ մասով (զորամաս կամ հատուկ պահպանվող զինվորական այլ տարածք ապօրինի մուտք գործելը):

Մեր տեղեկություններով` Արմեն Եփրեմյանը ցանկացել է ծառայությունն իրականացնողներին ծխախոտ հյուրասիրել եւ պատահմամբ հարվածել է նախարարության դարպասներին: Նշենք, որ Եփրեմյանն ազատամարտիկ է, որպես կամավորական մասնակցել է նաեւ ապրիլյան պատերազմին:

Ըստ Քննչական կոմիտեի տարածած հաղորդագրության` 2017թ. փետրվարի 23-ին ժամը 00:20-ին Երեւանի բնակիչ Ա.Եփրեմյանը, գտնվելով անսթափ վիճակում, իր անձնական «Օպել Աստրա» մակնիշի ավտոմեքենայով հարվածել է ՀՀ ՊՆ վարչական համալիրի թիվ 2 մուտքի դարպասներին եւ ավտոմեքենայով՝ սահմանված կարգի խախտմամբ, ապօրինի ներխուժել ՀՀ ՊՆ տարածք:

Հսկիչ անցագրային կետի հերթապահ ենթասպան իրեն ամրակցված ատրճանակից արձակել է ութ կրակոց ավտոնեքենայի ուղղությամբ, որի արդյունքում քաղաքացի Ա.Եփրեմյանը չի տուժել:

Դեպքի առթիվ հարուցվել է քրեական գործ Քրեական օրենսգրքի 258-րդ հոդվածի 2-րդ մասով (խուլիգանությունը, որը զուգորդվել է ուրիշի գույքը ոչնչացնելով կամ վնասելով) եւ 327.6-րդ հոդվածի 1-ին մասով (զորամաս կամ հատուկ պահպանվող զինվորական այլ տարածք ապօրինի մուտք գործելը):

Կատարվում է նախաքննություն: