Հայաստանում իշխանությունները խոչընդոտում են Մարտի 1-ի բացահայտմանը: Այս մասին այսօր՝ մարտի 1-ին, լրագրողների հետ զրույցում ասել է «Ելք» դաշինքի ցուցակի երկրորդ հորիզոնականը զբաղեցնող Արամ Զ. Սարգսյանը:
«Խորհրդարանական ընտրություններին մասնակցող 9 քաղաքական ուժերից 8-ը հայտարարում են, որ, եթե իրենք գան իշխանության՝ բացահայտելու են Մարտի 1-ը: Սա ամրագրումն է այն բանի, որ Հայաստանում ՀՀԿ-ն խոչընդոտում է Մարտի 1-ի բացահայտմանը: Միեւնույն ժամանակ, ես նույնիսկ անհարմար եմ զգում այս օրերին պատասխանել հարցին, թե, եթե մենք գանք իշխանության՝ կբացահայտենք, թե չէ: Որովհետեւ սա այն խնդիրն է, որ քաղաքական ուժը չպետք է հիշի ընտրությունների ժամանակ, պետք է ընթացքում ապացուցի, որ ինքն այս երկրի փոփոխությունները տեսնում է նման գործերը բացահայտած»,-ասաց նա:
Նա նաեւ նշեց, որ խորհրդարանական ընտրությունների ժամանակ, եթե իշխանությունները ընտրակեղծիքների գնան՝ «Ելք» դաշինքը Երեւանի Ազատության հրապարակում շարունակելու է պայքարը՝ հանուն արդարության:
Նշենք, որ «Ելք» դաշինքն այսօր երթով շարժվել է դեպի Մյասնիկյանի արձան եւ հարգեցլ Մարտի 1-ի զոհերի հիշատակը:
Հիշեցնենք, որ ուղիղ 9 տարի առաջ Երեւանի կենտրոնում ողբերգական իրադարձություններ տեղի ունեցան, որի հետեւանքով զոհվեց 10 քաղաքացի: 2008թ. փետրվարի 18-ի նախագահական ընտրություններից հետո ՀՀ առաջին նախագահ Լեւոն Տեր-Պետրոսյանի կողմնակիցները հավաքվել էին Ազատության հրապարակում եւ պահանջում էին ընտրությունների արդյունքների վերանայում: Նրանք 10 օր շարունակ շուրջօրյա հանրահավաքներ էին անցկացնում Ազատության հրապարակում:
Մարտի 1-ի առավոտյան ոստիկանությունը ուժով ցրեց Ազատության հրապարակում հավաքվածներին: Մարդիկ սկսեցին հավաքվել Մյասնիկյանի արձանի մոտ: Նույն օրը երեկոյան երկրի նախագահ Ռոբերտ Քոչարյանն արտակարգ դրություն հայտարարեց, ապա ուժային կառույցները հրազեն կիրառեցին անզեն ցուցարարների դեմ, որի հետեւանքով զոհվեց 10 քաղաքացի, այդ թվում երկու ոստիկան, եւս 200 մարդ տարբեր աստիճանի վնասվածքներ ստացան: