Երեւանի Խանջյան փողոցում գտնվող վերամբարձ կռունկից նետվել սպառնացող տղամարդուն որպես անհայտ կորած երեք օր որոնել են: Այս մասին NEWS.am-ի հետ զրույցում ասաց նրա կինը՝ Թ. Ղազարյանը: Նա նշեց, որ այսօր ԱԻՆ-ից են զանգել եւ տեղեկացրել, որ երեք օր առաջ տնից դուրս եկած եւ չվերադարձած ամուսինը Երեւանում բարձրացել է վերամբարձ կռունկի վրա եւ սպառնում է նետվել:
«Տաքսի էր քշում օրավարձով, խփել էր մեքենան եւ մեքենայի տերը 1 միլիոն դրամ է պահանջում, մենք էլ էդ գումարը չունենք: Բանկերից վարկ է պահանջում, որ պարտքատերերին գումարը տա, վարկ չեն տալիս: Պարտքատերերն էլ անընդհատ անհանգստացնում են»,-պատմեց նրա կինը:
NEWS.am-ի թղթակիցն հաղորդում է, որ այս պահին 57-ամյա Մ. Մ-ին կինը համոզում է, որպեսզի նա ներքեւ իջնի, սակայն, տղամարդը շարունակում է մնալ վերամբարձ կռունկի վրա:
57-ամյա տղամարդը պահանջում է, որ իրեն բանկերը վարկ տրամադրեն, որպեսզի կարողանա պարտքատերերին տալ գումար:
Այս պահին տղամարդու հետ աշխատում են հոգեբանները, սակայն, նա թույլ չի տալիս, որպեսզի փրկարարներն իրեն մոտենան:
Ավելի վաղ տեղեկացրել էինք, որ ժամը 12:10-ի սահմանում քաղաքացին Երեւան քաղաքի Խանջյան փողոցում` ամբարձիչ կռունկի վրա է բարձրացել եւ սպառնում է նետվել: