Մինչեւ ապրիլի 2-ը այդպիսի նախադեպեր չեն լինելու, դրանից հետո կանդրադառնանք մարդկանց հազարավոր խնդիրներին: Այս մասին, այսօր՝ մարտի 9-ին, լրագրողների հետ զրույցում նշեց «Ծառուկյան» դաշինքի ցուցակի 8-րդ հորիզոնականը զբաղեցնող, Գագիկ Ծառուկյանի մամուլի խոսնակ Իվետա Տոնոյանն անդրադառնալով ԿԸՀ նախագահ Տիգրան Մուկուչյանի հայտարարությանը, ըստ որի Ծառուկյանը ընտրարշավի ժամանակ դրամական ու նյութական խոստումներով տալով խախտել է օրենքը։
Իվետա Տոնոյանի խոսքով, ցանկացած հանդիպումից հետո հարյուրավոր մարդիկ աջակցության խնդրանքով դիմում են Ծառուկյանին, սկսած առողջապահական խնդիրներից, վերջացրած սոցիալականով, գյուղատնտեսականով, կամ ավելի գլոբալ հարցերով:
«Այս դեպքում Տավուշի մարզում պարոն Ծառուկյանի արձագանքը պարզապես կարելի է դիտարկել մարդկային զգացմունքայինի դաշտում, որովհետեւ որեւէ մեկին որեւէ բան չի տրամադրվել, միայն ասվել է, որ, այո, կանդրադառնան այդ հարցերին:
Մեր դիրքորոշումն է` ինչպես որ օրենքով սահմանված է, մինչեւ ապրիլի 2-ը այդպիսի նախադեպեր չեն լինելու եւ ապրիլի 2-ից հետո մենք կանդրադառնանք այդ հազարավոր խնդիրներին: Անդրադառնալով ընտրակաշառք ձեւակերպմանն ուզում եմ նշել, որ համաձայն չեմ, միայն պարոն Ծառուկյանի մարդկային, զգացմունքային վերաբերմունքն է եղել իրեն դիմող մարդկանց»,-ասաց Տոնոյանը:
Նկատենք, որ այսօր Արմավիրի մարզում քարոզչության ժամանակ Ծառուկյանը շարունակում էր խոստումներ տալ մարդկանց, գյուղացիներին, սակայն նշում էր, որ այդ օգնությունը կհատկացվի ապրիլի 2-ից հետո, որպեսզի ընտրական օրենսգրքի խախտում չդիտվի:
Խնդիրն այն է, սակայն, որ Ընտրական օրենսգրքի համաձայն, նախընտրական քարոզչության ժամանակ կուսակցություններին արգելվում է ընտրողներին անհատույց կամ արտոնյալ պայմաններով տալ կամ խոստանալ դրամ, սննդամթերք, ապրանքներ: Արգելվում է նաեւ մատուցել կամ խոստանալ ծառայություններ:
Ավելի վաղ ԿԸՀ նախագահ Տիգրան Մուկուչյանը NEWS.am-ին հայտնել էր, որ նման խոստումներ տալը օրենսդրության խախտում է. «Դա օրենքի խախտում է, եւ դրա վերաբերյալ մենք արդեն իրազեկել ենք նրանց, որպեսզի դադարեցվի եւ հետագայում նման օրենքի խախտումներ չթույլատրվեն: Շարունակվելու դեպքում Կենտրոնական ընտրական հանձնաժողովն արդեն համապատասխան վարույթ կհարուցի, միջոցներ կձեռնարկի, որոնք ամրագրված են Ընտրական օրենսգրքում»:
