«Ծառուկյան» դաշինքի առաջնորդ Գագիկ Ծառուկյանն այսօր՝ մարտի 9–ին, Արմավիրում ընտրողների հետ հանդիպմանը կրկին նյութական խոստումներ տվեց, չնայած ԿԸՀ–ն արդեն զգուշացրել է՝ օրենքը մի խախտեք։

NEWS.am–ի թղթակիցը Արմավիրից հաղորդում է, որ Գագիկ Ծառուկյանին հավաքվածներից մեկը խնդրեց գյուղին տեխնիկա նվիրել։

«Ապրիլի 2–ից հետո Ծառուկյանը ձեր գյուղին տեխնիկա կնվիրի, բայց ընտրություններից հետո, որ ընտրությունները կապ չունենան»,– հայտարարեց Գագիկ Ծառուկյանը։

Քաղաքացիներից մեկն էլ դպրոցի համար անհրաժեշտ գույք խնդրեց։ Ծառուկյանը կրկին խոստացավ՝ ապրիլի 2–ից հետո բոլոր սարքավորումները դպրոցը կստանա։

Նշենք, որ Ընտրական օրենսգրքի համաձայն, նախընտրական քարոզչության ժամանակ կուսակցություններին արգելվում է ընտրողներին անհատույց կամ արտոնյալ պայմաններով տալ կամ խոստանալ դրամ, սննդամթերք, ապրանքներ: Արգելվում է նաեւ մատուցել կամ խոստանալ ծառայություններ:

Ավելի վաղ NEWS.am-ը հայտնել էր, որ մարտի 7–ին Տավուշի մարզում նախընտրական քարոզարշավի ժամանակ «Ծառուկյան» դաշինքի ցուցակը գլխավորող Գագիկ Ծառուկյանը բնակիչներին խոստանում էր օգնություն տրամադրել: Մասնավորապես, ԲՀԿ առաջնորդը խոստացել է խաղաղն ընդունել 150 դրամով, գյուղտեխնիկա տրամադրել, գազիֆիկացնել տները եւ այլն: