Նիկոլ Փաշինյանի վերջին ելույթները ոչ միայն հերթական շանտաժն են, այլ վարկաբեկում են բոլորիս՝ հանուն իր անձնական շահերի: Այս մասին armlur.am-ի հետ զրույցում ասել է Տրանսպորտի եւ կապի նախկին նախարար Գագիկ Բեգլարյանը՝ անդրադառնալով «Ելք» դաշինքի անդամ Նիկոլ Փաշինյանի հրապարակած տեսանյութին, որում նա համեմատություն էր կատարել Բեգլարյանի եւ ԽՍՀՄ առաջին եւ վերջին նախագահ Միխայիլ Գորբաչովի միջեւ, ապա ցույց տվել Երևան-Աշտարակ ճանապարհին գտնվող կիսավարտ մի կամուրջ, որն իր գնահատմամբ` Հյուսիս-հարավ ծրագրի թերացումն է եղել:
«Այո, մենք ավարտել ենք Հյուսիս-հարավ ճանապարհի այդ հատվածի շինարարությունը, որի բացմանը ներկա է եղել Հանրապետության նախագահը: Ու հենց այդ օրը տեղի բնակչության ներկայացուցիչները`մարզպետի հետ միասին, խնդրեցին Հանրապետության Նախագահ Սերժ Սարգսյանին, որ այդ ճանապարհի վրա ունենանք լրացուցիչ ևս մի քանի կամուրջներ, ինչը նախատեսված չէր միջազգային ճանապարհաշինական նորմերով: Այսինքն` նշված աշխատանքները կապ չունեն հիմնական ճանապարհի ավարտված շինարարական աշխատանքների հետ»,- ասել է Բեգլարյանը՝ ընդգծելով, որ ներկայում տնտեսված գումարներով վերակառուցվում են նշված հատվածի թվով վեց առկա վերգետնյա անցումները:
Բեգլարյանի խոսքով՝ Փաշինյանն «շանտաժներով, սոցցանցերում ցեխ շպրտելով» մտադիր է վարկաբեկել Բեգլարյաններին, որը, նրա համոզմամբ, Փաշինյանին չի հաջողվի: