Արմավիրի շրջանի Ջրառատ գյուղում տեղի ունեցած միջադեպն անթույլատրելի է։ Այս մասին մարտի 14-ին հայտնել է Հայաստանի վարչապետ Կարեն Կարապետյանը Նոր Նորք վարչական շրջանի ընտրողների հետ հանդիպման ժամանակ։
Նրա խոսքով զինված մարդը վտանգավոր է բոլորի համար։ «Դրա համար էլ մեզնից, որպես ղեկավարներից, պահանջվում է այդ ուղղությամբ քրտնաջան աշխատանք կատարել»,- շեշտել է Կարեն Կարապետյանը։
Հիշեցնենք, որ ըստ Հայաստանի Քննչական կոմիտեի նախնական տվյալների, Ջրառատ գյուղում մարտի 14-ի ժամը 13։30-14։00 ժամանակահատվածում վեճ է բռնկվել, որը վերածվել է կռվի, որի ժամանակ հնչել են կրակոցներ ինքնաձիգից։ Միջադեպի հետեւանքով երեք մարդ է հիվանդանոց տեղափոխվել։ Նախնական բժշկական հետազոտության արդյունքներով, տուժածներից մեկը ոտքից հրազենային վիրավորում է ստացել, երկրորդի նկատմամբ օգտագործվել է կտրող- ծակող առարկա, ինչի հետեւանքով վնասվել է նրա մեջքը, իսկ երրորդ տուժածի մոտ ձախ ձեռքի կոտրվածք է։ Այդ փաստով հարուցվել է քրեական գործ ՔՕ 112, 258 ու 235 հոդվածներով։
Ավելի վաղ Օհանյան- Րաֆֆի-Օսկանյան դաշինքի շտաբը տարածել էր հայտարարություն, որում նշել էր, որ Ջրառատ գյուղում մարտի 14-ին զինված հարձակում է իրականացվել «Օհանյան- Րաֆֆի- Օսկանյան» դաշինքի համախոհների վրա, ինչի հետեւանքով կան վիրավորներ։
