Ռուսաստանի Դաշնության կառավարության ընդունելությունների տանը մեկնարկել է Նախագահ Սերժ Սարգսյանի հանդիպումը ՌԴ կառավարության նախագահ Դմիտրի Մեդվեդևի հետ:

 Հանդիպման սկզբում Մեդվեդեւը նշել է, որ իր հայ գործընկերոջ հետ հանդիպման ժամանակ նշվել է, որ նույնիսկ ընթացիկ դժվարությունների պայմաններում, երկու երկրների միջեւ ապրանքաշրջանառությունը աճում է, համենայն դեպս Հայաստանից Ռուսաստան գյուղատնտեսական ապրանքների մատակարարումների դեպքում։ «Դա նշանակում է, որ ինտեգրումը տալիս է իր պտուղները։ Այնպես որ կարող ենք քննարկել նաեւ այդ թեմաները»,- նշել է նա։

 Սերժ Սարգսյանն էլ իր հերթին նկատել է, որ նույնպես ջերմությամբ է հիշում Մեդվեդեւի հետ հանդիպումները, քանի որ դրանք միշտ անցել են փոխվստահության մթնոլորտում։ «Իհարկե մենք դեռ հարցեր ունենք քննարկելու, քանի որ մեր համագործակցությունը մշտապես խորանում է, ընդլայնվում ու այդ հարցերը հնարավոր չէ լուծել առանց Ռուսաստանի կառավարության ակտիվ մասնակցության»,- ասել է նա։ Դրան Ռուսաստանի վարչապետը հավելել է «Եվ առանց Հայաստանի կառավարության»։

Նշենք, որ Սերժ Սարգսյանն ավելի վաղ հանդիպում է ունեցել ՌԴ նախագահ Վլադիմիր Պուտինի հետ: