Վորլդ Վիժն Հայաստանը Beeline-ի հետ համատեղ հայտարարում են «Երեխաների առցանց անվտանգություն» ծրագրի մեկնարկի մասին: Ծրագիրը կիրականացվի Կապանում, Թալինում եւ Երեւանում:
Beeline-ից NEWS.am_ին հայտնում են, որ «Երեխաների առցանց անվտանգություն» ծրագրի նպատակն է բարձրացնել երեխաների ու նրանց ծնողների/խնամակալների` ինտերնետից անվտանգ օգտվելու մասին իրազեկվածության մակարդակը: Ծրագիրը կտեւի 12 ամիս ու կներառի Վորլդ Վիժն Հայաստանի ծրագրերին մասնակցող 7-18 տարեկան 600 երեխաների ու պատանիների, 90 ծնողների, խնամակալների եւ 30 ուսուցիչների:
«Առցանց անվտանգության խնդիրն իսկապես հրատապ է, քանի որ շատ ծնողներ ու երեխաներ պատշաճ պաշտպանված չեն առցանց տիրույթում: Մեր ունեցած տվյալների համաձայն` ծնողների 57%-ն ու երեխաների 35%-ը ծանոթ չեն այն ծառայություններին, որոնց պետք է դիմել առցանց վտանգների, հատկապես բռնության դեպքերի հանդիպելու պարագայում»,- ասում է Վորլդ Վիժն Հայաստանի ծրագրի տնօրեն Ժիրայր Էդիլյանը:
«Beeline-ը, մեծապես կարեւորում է տեղեկատվական տեխնոլոգիների վերաբերյալ գիտելիքների զարգացմանն ուղղված ծրագրերը՝ հատկապես երիտասարդների եւ երեխաների շրջանում: «Երեխաների առցանց անվտանգություն» ծրագրի մեկնարկը մեծ նշանակություն ունի մեզ համար, քանի որ այն ծնողներին, մանկավարժներին, ինչպես նաեւ իրենց` երեխաներին, հնարավորություն կտա ստանալ մասնագիտական աջակցություն եւ գիտելիքներ՝ ինտերնետից անվտանգ օգտվելու վերաբերյալ», - նշեց Հայաստանում Beeline-ի Գլխավոր տնօրեն Անդրեյ Պյատախինը։
Երեխաների առցանց անվտանգության ծրագրի շրջանակներում երեխաներն ու երիտասարդները կմասնակցեն տարբեր դասընթացների` ծանոթանալով առցանց անվտանգության կանոններին ու մեխանիզմներին: Իսկ ծնողները կտեղեկացվեն սոցիալական ցանցերից անվտանգ օգտվելու սկզբունքներին, երեխաներին արդյունավետ հետեւելու ու վերահսկելու գործիքներին, վտանգներին եւ այլն: Ծրագրում ներառված կլինեն նաեւ ուսուցիչներ, ովքեր կսովորեն դպրոցականների օնլայն վարքագծին հետեւելու սկզբունքները:
