iPhone 8-ը, որը Apple ընկերությունը կներկայացնի 2017 թվականի աշնանը, նման կլինի օրիգինալ iPhone-ին: Այս մասին հայտնել է կորեական ET News պորտալը՝ վկայակոչելով անանուն աղբյուրին:
Ինսայդերի փոխանցմամբ՝ սմարթֆոնը կունենա «կաթիլաձեւ դիզայն», այսինքն հետեւի վահանը եւ կողմնային եզրագծերն ավելի կլորացված կլինեն, քան ներկայիս iPhone-ների մոտ է: Նշվում է, որ ընկերությունն այսպիսով ձգտում է վերաստեղծել ամենաառաջին iPhone-ի դիզայնը, որը ներկայացվել է 10 տարի առաջ:
«Նոր iPhone-ի հետեւի կափարիչը կպատրաստվի ապակուց: Այն բոլոր 4 կողմերում կլորացված կլինի»,- հայտնել է աղբյուրը:
Մարտի սկզբին հաղորդվել էր, որ iPhone 8-ը կունենա 5,8-դյույմանոց OLED դիսփլեյ, որի հիմնական մասը կկազմի 5,15 դյույմ: Էկրանի ստորին մնացած տարածքը կզբաղեցնի «գործառնական գոտին», որի վրա տեղադրված են կոճակները եւ մատնահետքերի սքաները: Այս երկու էկրաների ընդհանուր անկյունագիծը 5,8 դյույմ է:
