Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչության պետ Սերգեյ Ավետիսյանն Արաբական Միացյալ Էմիրություններ (ԱՄԷ) այցի ժամանակ «Հայաստան-Արաբական Միացյալ Էմիրություններ» ներդրումային համաժողովի շրջանակներում հանդիպել է ԱՄԷ էկոնոմիկայի նախարար Սուլթան բին Սայիդ Ալ Մանսուրիի հետ։
ՔԱԳՎ-ից NEWS.am-ին հայտնում են, որ հանդիպման ընթացքում քննարկել են ՀՀ-ի եւ ԱՄԷ-ի միջեւ օդային հաղորդակցությունների մասին միջկառավարական համաձայնագրի արդիականացման եւ ազատականացման հարցը: Արդյունքում ձեռք է բերվել պայմանավորվածություն՝ երկու պետությունների ավիացիոն իշխանությունների եւ դեսպանատների աշխատակիցների ներգրավվածությամբ առաջիկայում բանակցություններ սկսել համաձայնագրի նոր տեքստի շուրջ։
ՔԱԳՎ պետ Սերգեյ Ավետիսյանն այցի շրջանակներում հանդիպել է նաեւ Flydubai ավիաընկերության փոխնախագահ Սուդիր Սրեդարանի հետ։
Վերջինս ողջունել է Հայաստանի եւ Էմիրությունների միջեւ վիզայի ազատականացումը, ինչպես նաեւ՝ իր ոգեւորությունն է արտահայտել Պարսից ծոցի երկրներում բնակվող Հնդկաստանի քաղաքացիների համար դյուրացված կարգով Հայաստան մուտք գործելու հնարավորության կապակցությամբ:
Flydubai ավիաընկերության փոխնախագահը նշել է, որ շնորհիվ այդ քայլերի, ԱՄԷ-ից բավականին մեծ ուղեւորահոսք է ակնկալվում դեպի ՀՀ: Ուղեւորահոսքի աճը կնպաստի նաեւ ՀՀ-ում զբոսաշրջության եւ տնտեսության զարգացմանը:
Հանդիպման ընթացքում նշվել է նաեւ, որ առաջիկայում նախատեսվում է ընկերության ներկայացուցիչների այցը Հայաստանի Հանրապետություն՝ հետագա համագործակցության մանրամասները քննարկելու նպատակով: