«Հյուսիս-հարավ» բետոնե մայրուղու ավտոճանապարհին արդեն 35 կմ է կառուցվել, որի վրա մոտ 70 մլն դրամ է ծախսվել, իսկ 2018-ին կկառուցվի եւս 42-ը։ Այս մասին Կառավարության նիստից հետո մարտի 23-ին լրագրողներին հայտարարել է ՀՀ տրանսպորտի, կապի եւ տեղեկատվական տեխնոլոգիաների փոխնախարար Արթուր Առաքելյանը։
Նրա խոսքով՝ Աշտարակ եւ Թալին քաղաքների միջեւ գտնվող ճանապարահահատվածում՝ Երեւանից հյուսիս, ակտիվորեն աշխատում է իսպանական Corsan Corviam ընկերությունը։ Ավելի հյուսիս հատվածում՝ Թալինից Գյումրի, աշխատում է չինական Sinohydro Corporation ընկերությունը։ Այստեղ աշխատանքները ծրագրվում է ավարտել 2018-ին։ Մյուս ճանապարհահատվածների համար վարկեր Կառավարությունը կներգրավի միայն անհրաժեշտության դեպքում, բայց հնարավորության չափով կներգրավվի մասնավոր ոլորտը։ Օրինակ՝ Սյունիքի մարզի լեռնային հատվածներում նախատեսված է թունելներ անցկացնել, որոնք, հնարավոր է, վճարովի կդառնան, քանի որ առավել հարմարավետ ու կարճ կլինեն։ Բայց նաեւ անվճար այլընտրանք կլինի՝ լեռնային ճանապարհների տեսքով։ «Քանի որ այստեղ եկամտի հնարավորություն կա, ապա կարելի է նաեւ մասնավոր ներդրումներ ներգրավել», - նշել է Առաքելյանը։
«Հյուսիս-հարավ» մայրուղին կկրճատի իրանական սահմանից մինչեւ վրացական սահման ճանապարհը, ինչպես նաեւ ներկայիս 556 կմ տարածությունը կհասցնի 495-ի՝ լեռնային ճանապարհահատվածների հարթեցման եւ նոր, առավել ուղիղների կառուցման հաշվին (Արարատ քաղաքից Վայոց Ձորի մարզ՝ մինչեւ Սիսիանի շրջանի Նորավան գյուղ, այնտեղից էլ՝ Քաջարան քաղաք)։ Շինարարության ընդհանուր արժեքը կկազմի մոտ 960 մլն դոլար, նախագծի հիմնական վարկատուն է Ասիական զարգացման բանկը (մոտ 500 մլն դոլար)։
