Գերմանացի գիտնականները ստեղծել են աշխարհի ամենամեծ «արհեստական արևը»՝ ինտենսիվ լույսի աղբյուր, որի օգնությամբ մտադիր են արտադրել էկոլոգիապես մաքուր վառելիք, հայտնում է The Guardian–ը։
«Լուսարձակներով» փորձը իրականացվում է Գերմանական աէրոտիեզերական կենտրոնում ՝ Քյոլնից 50 կմ հեռավորության վրա։ Այնտեղ գիտնականները տեղադրել են 149 լուսարձակներից կազմված մի սարք, որը ունակ է արտադրել այնպիսի լույս, որի ինտենսիվությունը բնական լուսավորությունից 10 հազար անգամ շատ է։ Եթե բոլոր լամպերը միանգամից մի կետի ուղղեն՝ այդ կետում ջերմաստիճանը կհասնի 3․5 հազար աստիճանի ըստ Ցելցիուսի։
Փորձի հիմնական նպատակն է մշակել արևային էներգիայի մեծ ծավալներ ստանալու օպտիմալ տարբերակ, որոնք բավարար կլինեն ջրածնային վառելիք ստանալու համար։
Այս սարքերը չորս ժամում նույնքան էլեկտրականություն են ծախսում, որքան չորս միջինվիճակագրական մարդիկ մեկ տարում։ Սակայն դրա հիման վրա գերմանացի հետազոտողները հույս ունեն այնպիսի սխեմա ստեղծել, որը թույլ կտա ջրածնի արտադրության համար օգտագործել արևային լույսը։