Ապրիլի վերջին կսկսվի Եվրոպական ընդհանուր ավիացիոն գոտու պայմանագրին Հայաստանի միանալու շուրջ Եվրոպական միության հանձնաժողովի եւ Հայաստանի միջեւ բանակցությունների առաջին փուլը: Այս մասին, այսօր՝ մարտի 24-ին, Բուլղարիայի մայրաքաղաք Սոֆիայում «Տրանսպորտային ոլորտի ներդրումային հնարավորություններ» խորագրով տարածաշրջանային համաժողովի շրջանակներում Եվրոպական հանձնաժողովի տրանսպորտի հարցերով հանձնակատար Վիոլետա Բուլչի հետ հանդիպման ժամանակ նշել է ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը:
Նախարարությունից NEWS.am-ին հայտնում են, որ նախարար Վահան Մարտիրոսյանը հանձնակատարին շնորհակալություն հայտնելով աջակցության համար՝ նշել է, որ ապրիլի վերջին կսկսվի Եվրոպական ընդհանուր ավիացիոն գոտու պայմանագրին Հայաստանի միանալու շուրջ Եվրոպական միության հանձնաժողովի եւ Հայաստանի միջեւ բանակցությունների առաջին փուլը: Հանձնակատար Վիոլետա Բուլչը դրական է գնահատել բանակցությունների սկիզբը եւ հաստատել, որ համաձայնագիրը շուտով կստորագրվի:
Քննարկելով հետաքրքրություն ներկայացնող այլ թեմաներ` առանձնահատուկ ուշադրություն է դարձվել տրանսպորտային ոլորտի թվայնացման եւ ճանապարհային երթեւեկության անվտանգության խնդիրներին, ինչին մեծ կարեւորություն է տալիս նաեւ Եվրոպական միությունը:
Հանդիպման ընթացքում նախարար Վահան Մարտիրոսյանը առաջարկել է Երեւանում կազմակերպել տարածաշրջանային տրանսպորտային հաղորդակցությունների համաժողով եւ հանձնակատար Վիոլետա Բուլչին հրավիրել է Հայաստան: