Արցախի պաշտպանական բանակի նախկին հրամանատար, անազատության մեջ գտնվող Սամվել Բաբայանը չի ցանկանում որեւէ դիրքորոշում հայտնել այն կապակցությամբ, թե ինչ դրդապատճառով են իշխանություններն իրեն կալանավորել։ Այս մասին NEWS.am–ի հետ զրույցում այսօր՝ մարտի 25–ին, ասել է Սամվել Բաբայանի փաստաբան Ավետիս Քալաշյանը։
Հարցին՝ Սամվել Բաբայանը համամի՞տ է «Օհանյան–Րաֆֆի–Օսկանյան» դաշինքի առաջնորդների այն հայտարարությանը, որ Սամվել Բաբայանին կալանովորելը քաղաքական հետապնդում է, պաշտպանը պատասխանեց. «Պարոն Բաբայանը չի ցանկանում որեւէ դիրքորոշում հայտնել այդ հարցի կապակցությամբ, ասում է՝ եթե առաջադրել են ակնհայտ անհիմն մեղադրանքեր, թող հետեւություններ անեն»։
Պաշտպանն ասաց, որ հնգօրյա ժամկետում բողոքարկելու է կալանքի որոշումը։
Նրա խոսքով, Սամվել Բաբայանին մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասի և 235.1 հոդվածի 2-րդ մասի հատկանիշներով։
Նշենք, որ ՀՀ ՔՕ-ի 235-րդ հոդվածի 2-րդ մասը սահմանում է՝ ապօրինի կերպով հրազեն, բացի ողորկափող հրազենից և դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, որոնք կատարվել են մի խումբ անձանց կողմից նախնական համաձայնությամբ: Պատժվում են ազատազրկմամբ՝ երկուսից վեց տարի ժամկետով:
235.1 հոդվածի 2-րդ մասը սահմանում է՝ խիստ ներգործող, թունավոր, պայթուցիկ, ռադիոակտիվ նյութերի, ճառագայթման աղբյուրների, միջուկային նյութերի, հրազենի կամ նրա բաղկացուցիչ մասերի, բացի ողորկափող որսորդական հրազենից և դրա փամփուշտներից, պայթուցիկ սարքերի, ռազմամթերքի, զանգվածային ոչնչացման զենքի, դրա տեղափոխման միջոցների, այլ զինամթերքի, ռազմական տեխնիկայի, զանգվածային ոչնչացման զենք կամ դրա փոխադրման հրթիռային համակարգեր ստեղծելու համար օգտագործվող այլ նյութերի կամ սարքավորումների, միջուկային, քիմիական, կենսաբանական կամ զանգվածային ոչնչացման այլ զենքի կամ երկակի նշանակության ապրանքների, ռազմավարական տեսակետից կարևոր հումքային ապրանքների կամ մշակութային արժեքների մաքսանենգությունը, որը կատարվել է մի խումբ անձանց կողմից նախնական համաձայնությամբ: Այն պատժվում է ազատազրկմամբ՝ երեքից յոթ տարի ժամկետով՝ գույքի բռնագրավմամբ:
Ավելի վաղ NEWS.am-ը հայտնել էր, որ Կենտրոն եւ Նորք- մարաշ վարչական շրջանների ընդհանուր իրավասության դատարանը մարտի 24–ին Սամվել Բաբայանին 2 ամսով կալանավորելու որոշում էր կայացրել։ Սամվել Բաբայանը չի ընդունում իրեն առաջադրված մեղադրանքը: Նա բերման էր ենթարկվել մարտի 22-ին, որի վերաբերյալ ՀՀ Ազգային անվտանգության ծառայությունը հաղորդագրություն էր տարածել, որ ձեչրբակալությունը իրականացվել է Հայաստանի Հանրապետություն «Իգլա» տեսակի զենիթա-հրթիռային համալիր տեղափոխելու փաստի առթիվ հարուցված քրեական գործի շրջանակներում։
