«Ելք» դաշինքը պատրաստվում է դիմում ներկայացնել ԿԸՀ` Հանրապետական կուսակցության գրանցումը չեղարկելու պահանջով: Այս մասին այսօր` մարտի 27-ին, Արարատի մարզում իրականացվող քարոզարշավի ժամանակ հայտարարել է «Ելք» դաշինքի երրորդ հորիզոնականը զբաղեցնող Նիկոլ Փաշինյանը:
Պատգամավորի խոսքով` դիմումը երկու օրերի ընթացքում կներկայացվի ԿԸՀ. «Մեր մասնագետների խումբը պատրաստում է համապատասխան դիմումը, որպեսզի վաղը կամ մյուս օրը ԿԸՀ ներկայացնի` ՀՀԿ-ին ընտրարշավից դուրս վռնդելու մասին, եւ մենք պետք է պայքարենք, որ Հանրապետական կուսակցությունը իր ընտրակեղծարարներով դուրս շպրտվի խորհրդարանական ընտրություններից, որպեսզի հայ ժողովուրդը ազատ ընտրություն անելու հնարավորություն ունենա»:
Նիկոլ Փաշինյանը նաեւ խոսեց այն ուժերի մասին, որոնք կարող են, ուզում են կամ չեն ուզում կոալիցիա կազմել Հանրապետական կուսակցության հետ:
«Շատ ուժեր կան, որոնք հայտարարում են, որ ոչ մի դեպքում կոալիցիա չեն կազմելու, բայց մենք մոռանում ենք մի հանգամանք` ՀՅԴ-ն, որը այսօր իշխանության կազմում է, ֆորմալ առումով կոալիցիա չի կազմել ՀՀԿ-ի հետ: Ամեն ինչ վկայում է այն մասին, որ բոլոր ուժերը` նախկին եւ ներկա գործընկեր, մասնավորապես «Ծառուկյան» դաշինքը, ՀՅԴ-ն կոալիցիայի անունը փոխում են եւ դնում Ազգային համաձայնության կառավարություն: Ձեւավորվում է մի նոր կոմբինացիա ժողովրդի ձայները, ժողովրդի հակասերժական եւ ընդիմադիր ձայները հավաքելու եւ Սերժ Սարգսյանին մատաղ անելու համար: Միակ ելքը «Ելք»-ի օգտին քվեարկելն է»,- ասել է Փաշինյանը:
Ելույթի ժամանակ Փաշինյանը նաեւ հայտարարեց, որ չի հավատում թե Օրինաց երկիր կուսակցությունը (այժմ` Հայկական վերածնունդ կուսակցություն-խմբ.) եւ Հայ հեղափոխական Դաշնակցությունը կանցնեն խորհրդարան. «Ոչ էն կանցնի, ոչ էլ էն»: