Երեւանի Ազատության հրապարակում մեկնարկել է «Կոնգրես-ՀԺԿ» դաշինքի հանրահավաքը:
NEWS.am-ի թղթակիցը հայտնում է, որ Ազատության հրապարակում հավաքված ցուցարարները եկել են ՀՀ դրոշներով, խաղաղության պաստառներով:
Ամբիոնում են ՀԱԿ փոխնախագահներ Արամ Մանուկյանը, Լեւոն Զուրաբյանը եւ ՀԺԿ նախագահ Ստեփան Դեմիրճյանը: ՀԱԿ առաջնորդ Լեւոն Տեր-Պետրոսյանը դեռ չի ժամանել, եւ հայտնի չէ, արդյոք մասնակցելու է հանրահավաքին: Նշենք, որ նա ամբողջ քարոզարշավի ընթացքում միայն երկու անգամ հեռուստատեսությամբ հարցազրույց է տվել, իսկ քարոզչական հանդիպումներին չի մասնակցել:
Հանրահավաքը վարող Արամ Մանուկյանը հայտարարեց. «Ոչ մեկի այգին քար չենք ուզում քցենք: Մենք քանի դեռ կանք, քանի պայքարում ենք, ոչ մի փող, ոչ մի կաշառք չի որոշելու, մենք ենք որոշելու մեր երեխաների ճակատագիրը»:
Նրա խոսքով, «Հայաստանը պետք է գնա խաղաղության ճանապարհով: Ովքեր վաստակել են հաղթանակը, նրանք էլ հասնելու են խաղաղության»:
Նշենք, որ հանրահավաքից հետո երթ է լինելու Երեւանի կենտրոնով՝ «Խաղաղ երթ» խորագրով»:
«Կոնգրես֊ՀԺԿ» դաշինքը ընտրություններին մասնակցում է «Խաղաղություն, հաշտություն, բարիդրացիություն կարգախոսով եւ հանդես է գալիս արցախյան հարցում փոխզիջումների օգտին: