«Ելք» դաշինքն այսօր՝ մարտի 30-ին, Հայաստանի Կենտրոնական ընտրական հանձնաժողովի մոտ ավարտել է իր երթ-հանրահավաքը (ֆոտոռեպորտաժ):
Այս պահին, սակայն, ԿԸՀ-ում դեռեւս ընթանում է «Ելք» դաշինքի դիմումի քննությունը՝ կապված գալիք խորհրդարանական ընտրություններին մասնակցության համար ՀՀԿ-ի գրանցումը ուժը կորցրած ճանաչելու հարցով դատարան դիմելու հետ:
«Ելք» դաշինքի երթը մեկնարկել էր «Մոսկվա» կինոթատրոնի մոտից, որն անցնելով Երեւանի կենտրոնական փողոցներով հասել էր ԿԸՀ շենքի մոտ:
Նշենք, որ ԿԸՀ-ում ներկայացնելով «Ելք» դաշինքի դիմումը՝ ԿԸՀ նախագահ Տիգրան Մուկուչյանը նշել է, որ ըստ դիմումի «նախընտրական քարոզչության ընթացքում դպրոցների ու մանկապարտեզների տնօրենները օգտագործել են դպրոցների ու մանկապարտեզների գույքը, օգտվել են այն փաստից, որ ուսանողները ու ծնողները կախման մեջ են տնօրեններից, խախտվել են նախընտրական քարոզչության հիմնական սկզբունքները։ Խախտումները միանգամայն զգալի են, քանի որ ներառել են հանրապետության ամբողջ տարածքը, ունեցել են կազմակերպված ու զանգվածային բնույթ»:
Հիշեցնենք, որ Դանիել Իոաննիսյանի ղեկավարած «Իրազեկ քաղաքացիների միավորում» ՀԿ-ն, որը խորհրդարանական ընտրություններին դիտոդական առաքելություն է իրականացնելու, արձանագրել է իշխող կուսակցության կողմից վարչական ռեսուրսի գործածման բազմաթիվ դեպքեր, մասնավորապես ավելի քան 100 դպրոցների ու մանկապարտեզների տնօրեններ կազմել էին ընտրողների ցուցակներ հօգուտ ՀՀԿ-ի։