Հայաստանում իշխանությունն այնքան անգործունակ է, այնքան անմրցունակ, որ եթե նույնիսկ ցանկանա հանձնել Արցախի շուրջ տարածքը, այստեղ էլ սխալ թույլ կտան, նրանց մոտ ոչինչ չի ստացվի։ Այս մասին մարտի 31-ին լրագրողների հետ հանդիպման ժամանակ ասել է «Օհանյան-Րաֆֆի-Օսկանյան» դաշինքից ՀՀ արտաքին գործխերի նախկին նախարար Վարդան Օսկանյանը։
Նրա խոսքով՝ Լեւոն Տեր-Պետրոսյանի հայտարարությունների միակ հասցեատերը Հայաստանի իշխանություններն են։ Քառօրյա ռազմական գործողություններից հետո արդեն մեկ տարի է անցել։
«Այդ օրերին Լեւոն Տեր-Պետրոսյանը հանդիպել է գործող նախագահին։ Եւ այդ օրվանից Տեր-Պետրոսյանն անխոս աջակցել է Արցախի շուրջ իշխանությունների վարած քաղաքականությանը։ Թող հանձնեին (տարածքները-խմբ)։ Ես չեմ հասկանում՝ ու՞մից է դժգոհ Տեր-Պետրոսյանը»,-հարց է տվել Օսկանյանը։ Ըստ ԱԳՆ նախկին ղեկավարի՝ Տեր-Պետրոսյանը պետք է դժգոհ լինի իշխանություններից։
«Իշխանություններն այնքան անգործունակ են, այնքան անմրցունակ, որ եթե ցանկանան տարածքներ հանձնել, կարող են սխալվել, նրանց մոտ նույնիսկ դա չի ստացվի։ Ինձ մի բան է ուրախացնում՝ այն, ինչ ցանկացել են անել իշխանությունները, միշտ հակառակն է ստացվել։ Եթե նրանք ցանկանան տարածքներ հանձնել, նշանակում է, ամեն ինչ հակառակը տեղի կունենա», - հավելել է Վարդան Օսկանյանը։
