Հայ Հեղափոխական Դաշնակցությունը միացել է կառավարության «Գնենք հայկականը» կոչին։ ՀՅԴ պատգամավորներ Արա Նռանյանը, Լիլիթ Շահբազյանն ու Արտյուշա Շահբազյանը ներկայացրել են «Պետական գնումների մասին» օրենքում փոփոխություն կատարելու նախագիծ։ Դրանով սահմանվում է, որ պետական գնումների ընթացքում պետք է նախապատվություն տրվի տեղական արտադրության ապրանքներին եւ ծառայություններին, եթե առաջարկվող գինը 15 տոկոսից ավելի չի գերազանցում արտասահմանյան ծագման ապրանքների գներին։ Այս օրենսդրական նախագիծը գտնվում է խորհրդարանի քառօրյայի օրակարգում։
Կառավարությունն, ի դեպ, բացասական եզրակացություն է նախապատրաստել դաշնակցության այս առաջարկի վերաբերյալ։ Կառավարությունում, հավանաբար, համարում են, որ «Գնենք հայկականը» կոչը վերաբերում է բացառապես սովորական մահկանացուներին, իսկ հարգարժան նախարարները նույնիսկ տեղական արտադրության ներքնազգեստ չեն ցանկանում հագնել՝ նախընտրելով թուրքականը։ Այսինքն իշխանությունը հասկանում է, որ ապրանք կամ ծառայություն ընտրելիս առաջին չափորոշիչը պետք է լինի որակը եւ որակին համապատասխան գինը, սակայն, չգիտես ինչու, հասարակությանը կոչ է անում, ապրանք գնելիս որպես չափոփոշիչ ընտրել նրա հայկական ծագումը:
Ֆորմալ առումով կառավարության բացասական եզրակացությունը հիմնավորվել է հետեւյալ կերպ. նախ՝ որ եթե այդ օրինագիծն ընդունվի, պետական գնումների ընթացքում նախապատվություն կտրվի թանկ ապրանքներին, եւ երկրորդ՝ դա կհակասի միջազգային պայմանագրերին: