Երեւանի ավագանու ընտրություններին մասնակցելու հայտ է ներկայացրել երեք քաղաքական ուժ:
NEWS.am-ի թղթակիցը Կենտրոնական ընտրական հանձնաժողովից հայտնում է, այսօր ժամը 18.00-ի դրությամբ, երբ լրացավ վերջնաժամկետը, փաստաթղթեր ներկայացրել է Հանրապետական կուսակցությունը, «Երկիր ծիրանի» կուսակցությունը եւ «Ելք» դաշինքը: Նշենք, որ իշխող կուսակցությունը փաստաթղթերը ԿԸՀ էր ներկայացրել վաղ առավոտյան, մինչդեռ մյուս երկու ուժերը` ժամը 17:00-ից հետո միայն:
Հիշեցնենք, որ Երեւանի ավագանու ընտրությունները տեղի կունենան մայիսի 14-ին: Ընտրություններին մասնակցող կուսակցությունների, կուսակցությունների դաշինքների գրանցման համար անհրաժեշտ փաստաթղթերը, Կենտրոնական ընտրական հանձնաժողովի որոշմամբ, պետք է ներկայացվեն 2017 թ. մարտի 30-ից մինչեւ ապրիլի 9-ի ժամը 18:00-ն։ Իսկ կուսակցությունների, կուսակցությունների դաշինքների ցուցակների գրանցումը կիրականացվի 2017 թ. ապրիլի 9-14-ին: Նախընտրական քարոզչությունը կմեկնարկի 2017 թ. ապրիլի 21-ին եւ կշարունակվի մինչեւ մայիսի 12-ը ներառյալ: