Հանրապետական կուսակցության նախկին փոխնախագահ, նախկին վարչապետ  Հովիկ Աբրահամյանը, որն այսօր  ընտանիքի հետ էր այցելել Ծիծեռնակաբերդի հուշահամալիր, NEWS.am–ի  հետ զրույցում ասաց, որ չի լքել Հանրապետական կուսակցությունը։

Հարցին, թե իր՝ ՀՀԿ–ն լքելուց հետո մե՞ծ  բան է կորցրել կուսակցությունը, Աբրահամյանը պատասխանեց. «Ես չեմ լքել Հանրապետականը եւ, կարծում եմ, որ  անփոխարինելի մարդիկ չկան»։ Նախկին վարչապետը անպատասխան է թողել հարցը, թե հնարավո՞ր է՝  անդամագրվի ԲՀԿ–ի շարքերը, որի միջոցով որդուն դարձրեց պատգամավոր։

Ինչ վերաբերում է որդու՝ Արտաշատի քաղաքապետ Արգամ Աբրահամյանի կարիերային, նախկին վարչապետն ասաց, որ որդին զբաղվելու է խորհրդարանական գործունեությամբ, իսկ թե երբ հրաժեշտ կտա քաղաքապետի պաշտոնին, կոնկրետ չնշեց։

Անդրադառնալով այն մեկնաբանություններին, որ չի պատրաստվում «հանձնել» հայրենի Արտաշատը, որտեղ ինքը մեծ ազդեցություն ունի եւ մորաքրոջ որդուն՝ Արտաշատի փոխքաղաքապետ Գագիկ Պողոսյանին է  պատրաստում որպես որդու իրավահաջորդ, Հովիկ Աբրահամյանն ասաց. «Ո՞ւմ հանձնեմ, ինչի՞ մասին է խոսքը, հանձնելու խնդիր չկա, ես ոչ մի թեկնածու չունեմ, նման խնդիր չկա, իմ որդին դեռ քաղաքապետն է, ամեն ինչ ապագայում կերեւա»։