Օրական 6 դրամով մենք ձեզ չենք կաշառելու այլեւս: Այս մասին այսօր` ապրիլի 26-ին, Երեւանի կենտրոնկան փողոցներում, քարոզարշավի ժամանակ հայտարարեցին «Երկիր Ծիրանի» կուսակցության անդամները:
Նրանց խոսքով` մարդիկ պետք է հանեն իրենց միջից կաշառվելու ընդունակությունը:
«Միթե՞ հայը այն մարդն է, որը պետք է կաշառվի 6 դրամով եւ ապրի ստորացված վիճակում: 6 դրամով վաճառվելուց առաջ հիշեք, թե մարշրուտկայով ինչ իրավիճակով եք տեղափոխվում, փոխադրվում քաղաքի մի ծայրից մյուսը: Հիշեք` պետական այրերի հետ բոլոր քաղաքական իրավիճակներում, պաշտոնյաների հետ շփվելիս ինչ ստորացումներ եք ունենում: Մի փաստաթղթի համար դռնեդուռ ընկած ինչ ստորացումներ եք արձանագրում: Մենք առաջարկում ենք այընտրանք, առաջարկում ենք ազատագրել մայրաքաղաքը եւ սկսում ենք Երեւանից: Լցրեք արեւի մայրաքաղաքը մարդկային ջերմությամբ»,-ասացին նրանք:
Քարոզարշավի մասնակիցները առաջարկում էին մարդկանց ավելի մոտիկից ծանոթանալ «Երեւանի սիրուն աղջկա»` «Երկիր Ծիրանի» կուսակցության քաղաքապետի թեկնածու Զարուհի Փոստանջյանի հետ.«Ծանոթացեք եւ օգնեք մեզ գրավել Արգիշտի 1-ը»: Հիշեցնենք, որ Երեւանի ավագանու ընտրությունները տեղի է ունենալու մայիսի 14-ին, որին մասնակցելու է Հայաստանի հնարապետական կուսակցությունը, «Երկիր Ծիրանի» կուսակցությունն ու «Ելք» դաշինքը:
