Ամերիկացի ծովային հետեւակայինը, ով հայտարարել է, որ հենց ինքն է սպանել «Ալ-Քաիդա»-ի առաջնորդ Ուսամա բեն Լադենին, հուշերի գիրք է թողարկել, որտեղ նկարագրել է «համար մեկ ահաբեկչի» վերջին րոպեները: Այս մասին հաղորդում է «ՌՒԱ Նովոստի»-ն` վկայակոչելով Daily Mail պարբերականին:
The Operator («Մեխանիկ») նոր գիրքը, որը հեղինակել է 41-ամյա զինծառայող Ռոբերթ Օ'Նիլլը, լույս է ընծայվել այս շաբաթ: Դրանում հեղինակը մանրամասն պատմում է 2011 թվականի սպանության գիշերվա իրադարձությունների մասին: Համաձայն նկարագրության Օ'Նիլլը դեմ առ դեմ է հանդիպել գրոհայինին:
Նրա որդուն` 23-ամյա Հալիդին գնդակահարելուց հետո զինծառայողները շտապել են զննել բեն Լադենի թաքստոցի մյուս սենյակները: Վերջիվերջո, Օ'Նիլլը տեսել է ահաբեկչին «ավելի բարձրահասակ ու նիհար, քան սպասում էր, ավելի կարճ մորուքով եւ ավելի սպիտակ մազերով»:
Զինծառայողը երկու անգամ կրակել է: «Բեն Լադենի գլուխը ճեղքվեց, եւ նա ընկավ»,-նկարագրում է գրքի հեղինակը:
