Երեւանի Նուբարաշեն վարչական շրջանում բացվելու է երկրորդ մանկապարտեզը՝  ծնողները այլեւս հերթ չեն պահի՝ իրենց երեխաներին մանկապարտեզ ուղարկելու համար։ Այս մասին մայիսի 1-ին հայտնել է Երեւանի քաղաքապետ, ՀՀԿ-ից քաղաքապետի թեկնածու Տարոն Մարգարյանը ՝ Նուբարաշենում ընտրողների հետ հանդիպման ժամանակ։

Նրա խոսքով, այդ հնարավորությունը կա ու այդ նախագիծը արդեն մեկնարկել է։ Մեկ այլ խնդիր է Նուբարաշենի աղբանոցը։ «Մեր առաջնային խնդիրներից մեկը վերաբերում է աղբանոցին, որը գտնվելով Նուբարաշենի հենց մուտքի մոտ, տհաճ իրավիճակ է ստեղծում այդ թաղամասի բնակիչների համար, ամբողջ ամռան ընթացքում տհաճ հոտն ու ծուխը ուղեկցում են բնակիչներին։ Ես վստահ եմ, որ շատ կարճ ժամանակում այդ ամենը կմնա անցյալում։ Աղբանոցի տեղում մենք կանաչ գոտի կստեղծենք։ Ուսումնասիրելով միջազգային փորձը՝ մենք աղբանոցի տեղում կկառուցենք վերամշակող գործարան։ Դրանով իսկ մենք վերջնականապես կլուծենք այդ խնդիրը, ոչ միայն Նուբարաշենի, այլեւ ամբողջ Երեւանի բնակիչների համար»,- շեշտել է Տարոն Մարգարյանը։

Ելույթից հետո Նուբարաշենի բնակիչները մոտեցել են քաղաքապետի թեկնածուին ու նրա հետ զրույցի ժամանակ բարձրացրել էլեկտրաէներգիայի, ոռոգման ջրի, դեպոզիտների ու աղբի հետ կապված խնդիրները։