Սանկտ Պետերբուրգի պետական ակադեմիական կապելայում մայիսի 17-ին կկայանա Հայաստանի ու Ռուսաստանի վաստակավոր արտիստուհի, աշխարհահռչակ դաշնակահարուհի Մարիա Ղամբարյանի համերգը։
«Փայլուն ու վիրտուոզային, քնարական ու զգայական, բուռն ու հուզիչ երաժշտություն է տիրելու Սանկտ Պետերբուրգի Պետական ակադեմիական կապելայի բեմին»,- ասվում է պետերբուրգյան Կապելայի հաղորդագրության մեջ։ Մարիա Ղամբարյանը կատարելու է Շոպենի ստեղծագործությունները։
Դաշնակահարուհին 91 տարեկան է։ Նա ծնվել է Երեւանում 1925-ին։
Սովորել է Մոսկվայի կոնսերվատորիային կից Կենտրոնական մանկական երաժշտական դպրոցում ու Մոսկովյան կոնսերվատորիայում։ Հայ դաշնակահարուհին բազմաթիվ փառահեղ համերգային շրջագայություններ է ունեցել թե ԽՍՀՄ-ում, թե արտեկրներում։