Եթե որոշ թվով մարդիկ ընտրակաշառք են վերցրել ու քվեարկել, հետընտրական գործընթացների դեպքում կաշառք վերցրած քաղաքացին դուրս կգա՞ Ազատության հրապարակ։ Այս մասին մայիսի15-ին լրագրողների հետ հանդիպման ժամանակ ասել է «Ելք» դաշինքից Երեւանի քաղաքապետի նախկին թեկնածու, ՀՀ 6-րդ գումարման խորհրդարանի նորընտիր պատգամավոր Նիկոլ Փաշինյանը։
Հարցին, թե արդյոք ընտրակաշառք բաժանելու փաստերը հետընտրական գործընթացների համար հիմք չեն կարող հանդիսանալ, պատգամավորն արձագանքել է. «Եթե քաղաքացուն 10 հազար դրամով ընտրատեղամաս են բերել, ապա 10 հազար դրամով էլ տուն կտանեն։ Թե՞ քաղաքացին, ով որոշել է չքվեարկել, Ազատության հրապարակ դուրս կգա։ Մենք քաղաքական գործընթացներում դատարկ կրակոցների իրավունք չունենք։ Ես ինքս նախկինում հայտարարել եմ, որ չեմ պատրաստվում Երեւանի բնակիչներին քաղաքի փոքր կենտրոն դուրս բերել։ Եթե քաղաքացին չի մասնակցել ընտրական գործընթացին, նշանակում է, քաղաքացին չի մասնակցի նաեւ հետընտրական գործընթացին»։
«Ելք» դաշինքից մեկ այլ պատգամավոր՝ Էդմոն Մարուքյանը նկատել է, որ ընտրակաշառք բաժանելու փաստը հիմք է դարձել, որ Երեւանու ավագանու ընտրություններին եւս 100 հազար բնակիչ մասնակցի։ «Եթե նրանք իրենց ձայները տային «Ելք» դաշինքի օգտին, ապա մենք այժմ մեկ այլ մամուլի ասուլիսում նստած կլինեինք։ Հնարավոր է, այդ մամուլի ասուլիսը կազմակերպված լիներ Երեւանի քաղաքապետարանում։ Եթե մենք հետընտրական գործընթացների համար հիմքեր տեսնեինք, ընտրությունների արդյունքների վերաբերյալ մեր հայտարարություններն այլ կլինեին», - հավելել է Մարուքյանը։
