«Հայաստանի էլեկտրական ցանցերը» սկզբունքային առարկություններ չունի էլեկտրաէներգիայի վաճառքի շուկայի ազատականացման դեմ: Մայիսի 18-ին կայացած մամուլի ասուլիսի ժամանակ այս մասին ասաց ընկերության գլխավոր տնօրեն Կարեն Հարությունյանը:
Առաջարկվող գաղափարի համաձայն՝ «Էլցանցերը» պետք է մնա 110 կՎ եւ ցածր բաշխիչ ցանցի միակ օպերատորը (տեխնիկական պատճառներով այստեղ չեն կարող լինել մի քանի տարբեր ընկերություններ): Իսկ էլեկտրականության վաճառքը բաժանորդներին (այսինքն՝ ենթակայաններից վերջնական սպառողներին) կարող են իրականացնել այլ ընկերություններ: «Մենք դեմ չենք նման կարգին, եթե այն հիմնավորված լինի եւ խելամիտ կազմված: Իսկ շուկայի ազատականացումը միշտ լավ է, դա շուկային կօգնի»,- նշեց Հարությունյանը: