Հայաստանում բիզնեսը չի օգտվում աշխատատեղեր ստեղծելիս տրամադրվող եկամտահարկի արտոնություններից: Այս մասին մայիսի 20-ին ՀՀ խորհրդարանի նիստի ժամանակ հայտարարել է ԱԺ փոխխոսնակ, «Ծառուկյան» դաշինքի պատգամավոր Միքայել Մելքումյանը` Տնտեսական հարցերի հանձնաժողովի նախագահի պաշտոնում ՀՀԿ թեկնածու Խոսրով Հարությունյանի թեկնածությունը քննարկելիս:
Գործող օրենքի համաձայն` բինզեսը կարող է չեղարկել եկամտահարկի մինչեւ 30 տոկոսը, եթե ցույց է տալիս, որ այդ գումարներով վճարում է նոր աշխատակիցների աշխատավարձը:
«Դա ձեռնտու է եւ բիզնեսին, եւ պետությանը, քանի որ խթանում է նոր աշխատատեղերի ստեղծում, սակայն բիզնեսը դրանից գործնականում չի օգտվում: Պետք է հասկանալ` ինչո՞ւ», - հայտարարել է Մելքումյանը:
Ի պատասխան՝ Հարությունյանը նկատել է, որ աշխատատեղերի ստեղծումը, դժբախտաբար, դեռ այնպիսի ծավալների չի հասել, որ հարկային չեղարկումները նկատելի դառնան: