ԵՄ-ից Մեծ Բրիտանիայի դուրս գալու մասին բանակցությունները հավանաբար հունիսի 19-ին կսկսվեն։ Այս մասին մայիսի 22-ին ասել է ԵՄ բանակցային խմբի ղեկավար Միշել Բարնյեն, հաղորդում է DW-ը։
Ավելի վաղ, այդ նույն օրը, ԵՄ 27 անդամները Բարնյեին լիազորել էին սկսել Brexit –ի մասին բանակցային գործընթացը։ Բանակցությունների վերջնական նպատակն է մինչեւ 2019-ի մարտը կնքել ԵՄ-ից Մեծ Բրիտանիայի դուրս գալու պայմանների մասին համաձայնագիրը։
The Financial Times-ը մայիսի 3-ին հայտնել էր, որ ԵՄ-ն կտրուկ ավելացրել է ԵՄ-ից դուրս գալու համար Բրիտանիային ներկայացվող ֆինանսական պահանջների գումարը։ Հիմա Լոնդոնից պահանջում են նախապես վճարել մինչեւ 100 մլրդ եվրո, ինչը պայմանավորված է մի խումբ երկրների՝ այդ թվում Գերմանիայի ու Ֆրանսիայի կողմից պահանջների խստացմամբ։
Մինչ այդ Լոնդոնից ծրագրվում էր պահանջել մոտ 60 մլրդ եվրո։ Այդ հաղորդագրություններից անհանգստացած՝ Լոնդոնը նույնիսկ սպառնացել է դադարեցնել ԵՄ-ից դուրս գալու մասին բանակցությունները։
